Қаллибек Нағметов: Жоғалған «ақ қапшық»

Ҳәзирги жылдырымдай тез пәт пенен раўажланып атырған дәўирде инсанлардың мәлимлеме алыўға болған талабы күн сайын артып бармақта. Бундай талап әсиресе қәлем тербетиўши кәсип ийелеринде күшли болса керек деп есаплайман. Соның ушын болса керек мектепте, кейин ала университетте оқып жүрген күнлеримнен баслап-ақ пайтахтымыздағы Ботаника бағы аты менен аталатуғын кɵшеде жасайтуғын, ер жеткенинен баслап тап ҳүрметли дем алысқа шығаман дегенше сол ўақытлардағы газета-журнал ҳәм хат тасыўшылардың ең әҳмийетли ис қуралы есапланған қоңыр былғары сумкасын ийининен түсирместен қырқ жылға жақын халыққа хызмет қылған Жубатыр ағаны (жайы жәннетте болсын) асығыслық пенен күтетуғын едим. Нɵкис пенен Ташкенттен шығатуғын газета-журналлар сол күни, ал Москвада басылып Ташкентке фототелеграф арқалы жеткерилгеннен соң қайтадан жарық кɵретуғын басылымлар ертеңине түске шекем қолыма тиймесе ол ағайдың үйин тындырмай талай барғанларым есимде. Ҳә, айтқандай, сол дәўирдеги почта хызметкерлериниң образы Простоквашино аўылының турмысы ҳаққында сүўретке алынған мультфильмде ɵзиниң жарқын сәўлелениўин тапқан.

Бүгинги дәўирдиң почтальон Печкинлери болса пүткиллей басқаша. Қаламыздың кɵшелерине шығып 20-25 жастағы респондентлер арасында «Почтальон дегенде кɵз алдыңызға кимди келтирген болар едиңиз?» деген саўал менен блиц-интервью шɵлкемлестире қойғанымызда  биз жоқарыда келтирген образ ҳәм аты аталған былғары сумка ҳаққында жуўап ала алмаған болар едик деп ойлайман. Ҳәзиргиниң почтальонлары (бәлким олардың аты заман менен сай рәўиште «Баспа ɵнимлерин тарқатыўшы менеджер» болып ɵзгерген шығар) полиграфиялық бояўдың ийиси кетип үлгере қоймаған түрли атамадағы газет-журналларды, мениң бақлаўларым бойынша, ɵзлери жумыс ислейтуғын кәрханаларының заманагɵй автомбильлеринде тарқатады.

Қарақалпақстан телерадиокомпаниясының жәмәәтиде 2018–жыл алдынан республикамыздың ҳәм сырт еллердиң газета ҳәм журналларын тарқатыў менен шуғылланатуғын бир қатар жуўапкершилиги шекленген жәмийетлер менен шәртнама дүзип, жаңалықлардан ɵз ўақтында хабардар болып барыўды режелестирген еди. Соның ишинде «Аргументы и факты» газетасын жеткерип бериў бойынша шәртнаманы «Эксклюзив» ЖШЖ менен дүзген едик. Информация технологиялары раўажланған               ХХI әсирдиң қүдирети ҳәммеге аян болған дәўирде жасап атырған болсақта Москвада басылып дүнья жүзиниң кɵплеген еллерине аты мәлим болған ҳәптеликтиң Нɵкистиң орайына жетип келиўи қыйыншылық пенен кешпекте. Ҳәр ҳәптениң сәршемби күни жарық кɵретуғын газетаны шемби күни кешке жақын алсақ малақайымызды аспанға ылақтырып қуўанатуғын едик. Соңын ала ҳәптелик басылым менен келеси ҳәптениң дүйшембисинде танысатуғын жағдайғада кɵнлигип кеттик. Ал бүгинги жағдай болса буннанда асып түсти. Шийшембиде келген почтамыздан «АиФ» газетасын таба алмағанлықтан, түсликтен соң «Эксклюзив» ЖШЖ пенен байланысып, олардың ҳал-жағдайлары менен қызықсындым. Ɵзин сортировщица Барно Сейтекова деп таныстырған хызметкердиң мәлим қылыўы бойынша бизиң қолымызға келип тийиўи лазым болған басылымлар Ташкенттен Нɵкиске ɵз ўақтында келип турған екен. Бирақ Ташкенттеги шериклериниң хызметкерлер кестесинде болған ɵзгерислер себепли «Эксклюзив»ке тийисли бир қатар қапшықлар жиберилмей пайтахтта қалып қойған. Соның ушын биз күтип отырған газетаның баспаны тәрк еткеннен бир ҳәпте ɵткеннен соң ғана Нɵкиске жетип келиўине үмит бар екенлиги маған түсиндирилди.

Ҳүрметли сайт оқыўшылары! Жигирма биринши әсирде жасап атырған болсақта газетаны гаджетлери жәрдеминде емес, ал мен сыяқлы қағазынан типографиялық бояўдың билинер билинбес ийиси аңқып турған ҳалатында оқыўды хош кɵретуғынларда бар екенлигине исенемен. Сизлерге хызмет кɵрсетип атырған жуўапкершилиги шекленген жәмийетлердиң ɵз ўазыйпасына болған жуўапкершилиги қалай? Пикирлериңизди жәрияласаңыз олардың бәсеки  базарындағы бүгинги аўҳалы ҳаққында мағлыўматқа ийе болар едик деп ойлайман. Жаз пасылы ɵткеннен соң кɵп кешикпей басланатуғын жазылыў мапазын ҳеш бир жаңалық тарқатыўшы ЖШЖ рекламация менен баслаўды қәлемесе керек деп ойлайман. Соның ушын сизлердиң пикирлериңиз бул базардағы жумыслардың ҳәзирги аўҳалын тәрезиге тартып, бүгинги күнниң почтальонларының қай бири оқыўшылардың кеўилинен шығып атыр ҳәм керисинше ким келеси мәўсимде шерик болып ислесиўге мүнәсип емес екенлигин ажыратып беретуғынлығын естен шығармайық.

Қаллибек Нағметов

Қарақалпақстан телерадиокомпаниясы директоры

Бөлимлер