Шымбайда еки балалар парки иске түсти

Бүгинги күни Шымбай районында 115 мыңға шамалас халық тыныш-татыў өмир сүрмекте. Соңғы ўақытлары елимизде Ҳүрметли Президентимиз Ш.Мирзиёев басшылығында республика ҳүкимети тәрепинен алып барылып атырған кең көлемдеги реформалар бул аймақ турғынларының да социаллық турмысында жаңаланыў ҳәм өзгерислердиң жүз бериўине өзиниң унамлы тәсирин тийгизбекте. Əсиресе «Халық мәмлекетлик уйымларға емес, мәмлекетлик уйымлар халыққа хызмет етиўи тийис» деген принцип тийкарында район ҳәкимлиги тәрепинен халықтың күн көриси ҳәм мәдений дем алысын жақсылаў мақсетинде жүргизилип атырған жумыслар дыққатқа ылайық.

Усындай ийгиликли ислерден руўхланған район исбилерменлери «1-июнь — Халықаралық балаларды қорғаў күни» байрамы қарсаңында Шахтемир стадионы жанында халқымыздың сүйикли шайыры, Өзбекстан Қаҳарманы И.Юсупов ҳүрметине улыўма майданы 20 гектарға тең Ибрайым Юсупов атындағы «SHIMBAYGOLDEN PARK» ҳәм «Жипек жолы» мәкан пуқаралар жыйыны аймағынан «Радуга» атлы мәдений мәдений дем алыў бағларын иске қосты.

— «Миллий банк»тен 3 миллиард сум кредит алып, Қытай мәмлекетинен заманагөй аттракционларды сатып алып орнаттық, — дейди исбилермен Бахыт Юсупова. Сондай-ақ, халыққа қолайлылық жаратыў мақсетинде парк ишине 3 мың түп шырша, емен, мың түп ҳәр қыйлы гүл нәллерин отырғыздық ҳәм 20 жумыссыз пуқараны жумыс пенен тәмийинледик.

Бул салтанатлы илажларға район ҳәкими П.Ещанов қатнасып, аймақ халқын, соның ишинде ертеңги келешегимиз болған балаларды байрам менен қутлықлап, бундай ийгиликли ислердиң әмелге асыўына өзлериниң салмақлы үлеслерин қосқан азаматларға ҳәкимлик тәрепинен миннетдаршылық билдирди ҳәм естелик саўғаларын тапсырды.

Раўаж УТЕПБЕРГЕНОВ.

                              

Бөлимлер