Дәстанның Португалиядағы жеңиси

Ҳүрметли Президентимиздиң «Ҳеш бир нәрсе мәмлекетти спорт киби дүньяға тез таныта алмайды» деп оғада дурыс атап өткениндей, ҳәзирги күнде мәмлекетимизде спорт тараўына қаратылып атырған күшли итибардың нәтийжесинде елимиз спортшылары жәҳән ареналарында жоқары нәтийжелерге ерисип, елимиз байрағын жоқары көтермекте.

Дәстан Атабалаев та усындай спортшылардың бири. Ол Ферғана ўәлаятында туўылған. Ҳәзирги күнде Бердақ атындағы Қарақалпақ мәмлекетлик университетиниң тарийх ҳәм ҳуқық факультети 3-курс студенти. Каратэ бойынша Өзбекистан сайланды командасының ағзасы.

 

Д.Атабалаев усы жылдың 12-14-август күнлери Португалия мәмлекетиниң Брага қаласында болып өткен каратэ бо­йынша жәҳән универсиадасына қатнасып, 75 килограммға шекемги кумитэ беллесиўлеринде 3-орынды ийелеўге еристи. Ол бүгинги күни тәжирийбели тренер Р.Казаковтың басшылығында шынығыўлар өткермекте.

Дәстанның буннан басқа да жетискенликлери мақтаўға ылайық. Мәселен, ол 2012-жылы Франция мәмлекетинде өткерилген жәҳән чемпионатына қатнасып, тәжирийбе топлаған болса, 2015-жылы Ташкент қаласында өткерилген Азия чемпионатында 2-орынды, 2016-жылы Өзбекистан чемпионатында биринши орынды жеңип алыўға еристи. Дәстан Өзбекистан сайланды командасы қурамында усы жылдың октябрь айында Австралия мәмлекетинде болып өтетуғын жәҳән чемпионатына таярлықлар көрмекте.

Әлбетте, спортшымыздың бундай үлкен табысларға ерисиўи, елимизде жаратылған имканиятлардың нәтийжесинде деп билемиз. Биз де Дәстан киби заманласларымыздың қатары көбейе бериўине үмит етемиз.

А.КЕҢЕСБАЕВ,

ҚМУ журналистика тәлим бағдары

2-курс студенти.

СҮЎРЕТТЕ: Д.Атабалаев

Бөлимлер