Шымбай районында «Жаслар күни» (Фото)

Бурынғы «Камолот» ЖЖҲ негизинде Өзбекстан Жаслар аўқамы дүзилди.

Усы мүнәсибет пенен районымызда салтанатлы байрам илажы болып өтти. Дәслеп мектеп, колледж жаслары ҳәм жәмлеспеген жаслар арасында академиялық лицей ҳәм «Ҳә­сиретли Ана» естелиги аралығына веломарофон жарысы өткерилип, жеңимпазлар анықланды ҳәм оларға шөлкемлестириўшилер тәрепинен Ҳүрмет жарлықлар ҳәм баҳалы саўғалар тапсырылды.

Буннан соң «Азиза» рестораны алдында «Жаслар күни» байрамына арналған салтанат болып, оны район ҳәкиминиң орынбасары У.Қалилаев ашып берди. Буннан соң Ташкент ирригация ҳәм аўыл хожалығын механизациялаў қәнигелерин таярлаў институты доценти, «Жаслар аўқамы» Өзбекстан Орайлық Кеңеси ўәкили Шарафатдин Нарбаев, районлық ХББ баслығы орынбасары Азамат Сулайманов, Мәденият бөлими баслығы Айпарша Каримбаевалар шығып сөйлеп, бәршени жаслар байрамы менен қутлықлады ҳәм жасларымыздың бүгинги арзыў нийетлериниң әмелге асыўында тилеклеслик билдирди.

Буннан соң жаслардың атқарыўындағы саз-сәўбет бағдарламалары, дүнья халықлары ойынлары, спорт мектеби оқыўшыларының гимнастикалық шынығыўлары көринислери, шайыр қызлардың дөретиўшилиги, дизайнерлер жарысы, «Жас аспазлар таңлаўы» бағдарламаларында жарыслар болып өтти.

Жарыс жуўмағында дизайнерлик бағдары бойынша Гүлназ Қыдыр­баева, Жарқынай Айбосынова, Дилбар Атамуратовалар тәрепинен таярланған ҳаял-қызлардың көйлек эскизлери жыйналғанлар нәзерине усынылды ҳәм оларға район ҳәкимлиги тәрепинен таярланған Ҳүрмет жарлықлары ҳәм баҳалы саўғалар тапсырылды.

— Мен усы жарыста өз шеберлигимди жумсап аспазлық қәбилетимди көрсетип,биринши орынды алыўға ылайық болдым. Усы байрам шөлкемлестириўшилерине өз миннетдаршылығымды билдиремен -дейди Мектепке шекемги билимлендириў бөлимине қараслы 24-санлы балалар бақшасы аспазы Гүлайым Алланазарова.

Кешки байрам сейиллери И.Юсупов атындағы мәденият ҳәм дем алыў бағы «SHIMBAY GOLDEN PARK» те даўам етти. Онда район ҳәкими П.Ещанов жаслар байрамы менен барлық жасларды қутлықлап Президентимиздиң Өзбекстан жасларына  қутлықлаўын оқып еситтирди.

Буннан соң өзлериниң белсендилиги менен епшиллигин ҳәм шаққанлықларын көрсеткен Жаслар аўқамы басланғыш шөлкем жетекшилери ҳәм Сәрдарлар кеңеси баслықлары сыйлықланып, оларға район ҳәкимлиги тәрепинен Ҳүрмет жарлығы ҳәм естелик саўғалары тапсырылды. Мәденият бөлими хызметкерлериниң заўықлы ойын-тамашалары менен биргеликте жас талант ийелери, белгили қосықшылардың саз-сәўбет бағдарламалары болса кешеге айрықша заўық бағышлады. Сондай-ақ, байрамға арнап шөлкемлестирилген китап көр­гизбелери, мәкеме ҳәм кәрханалар тәрепинен қойылған бос жумыс орынлары орын алып, белсенди жасларға район ҳәкимлигиниң саўғалары тапсырылды.

Жуўмақлап айтқанда шөлкемлестирилген байрам илажы қатнасыўшыларда бир өмирге татырлық тәсирлер қалдырды десек асыра айтпаған боламыз.

 

 

 

 

 

 

 

 

 

 

 

 

 

 

 

 

 

 

 

 

Бөлимлер