Қанлыкөл районында «Жаслар күни» (Фото)

2018-жылы 29-июнь күни Қанлыкөл районы ҳәкимлиги менен Өзбекстан Жаслар аўқамы районлық Кеңеси менен биргеликте «Жаслар күни»не арналған байрам илажлары даўамында «Ҳәким ҳәм жаслар» ушырасыўы болып өтти.

Ушырасыўда  район ҳәкими жасларды байрамы менен қутлықлады ҳәм оқыўларында өмир жолларында табыслар, ўатанына садық жаслар болыўын тиледи ҳәмде бир жыл даўамында аймақта жаслар сиясаты тараўында әмелге асырылған жумыслар бойынша район жасларына мағлыўматлар айтып өтилди.

Ушырасыўда оқыўшы жаслар қызықлы мағлыўматларға ийе болды ҳәм өзлериниң қызықтырған сораўларына жуўаплар алды.

Сондай-ақ, усы күни райондағы кем тәмийинленген бағыўшысынан айрылған социаллық қорғаўға мүтәж үй шәраятында тарбияланып атырған 25 майыплылығы бар жас өспиримлердиң үйлерине барып байрам менен қутлықлап, байрам саўғалары китаплар саўға етилди.

 

Буннан тысқары, Өзбекстан Жаслар аўқамы районлық Кеңеси тәрепинен  «Жайҳун» мәкан пуқаралар жыйыны аймағында жасаўшы 2005-жылы туўылған Реймов Алишерге байрам саўғалары менен майыплар арбасы тапсырылды.

30-июнь «Жаслар күни» Қанлыкөл районы аймағындағы «Арба» этномәдений дем алыў орайында, район ҳәкимлиги ҳәм Өзбекстан Жаслар аўқамының районлық Кеңеси менен биргеликте «Жаслар сейили»нде көргизбе шөлкемлестирилди.

Көргизбеде район аймағындағы жас исбилерменлер менен фермерлер ҳәмде өнерментлер тәрепинен ислеп шығарылған өнимлер менен қатнасты.

«Мен ҳәм Жаслар аўқамы» акциясында викторина сораў жуўаплары, асфальтқа сүўрет салыў бойынша  таңлаўлары өткерилди.

Соның менен бирге райондағы «90-жыллар мүзейи»ндеги ашық есиклер ҳәптелигинде билимлендириў мекемелери оқыўшы жаслары мүзейди тамашалады.

Буннан кейин район аймағындағы бағыўшысынан айрылған социаллық қорғаўға мүтәж ҳәмде үй шәраятында тәрбияланып атырған жас өспиримлер ушын байрам дастурханы жайылды.

Сондай-ақ, Аўыл хожалығы кәсип-өнер колледжинде колледж  питкериўшилери, жәмлеспеген жасларға арналған бос жумыс орынлары ярмаркалары өткерилип, ярмарка даўамында районлық мекеме, кәрханалар, фермер хожалыкларынан усынылған жумыс орынлары менен қатнасты.

Соның менен бирге өз бизнесин баслаў ушын коммерциялық банклердиң районлық бөлимлеринен жеңиллетилген кредит алыў бойынша мағлыўматларға ийе болды.

Буннан тысқары, «Бахытлы» дем алыў паркинде шөлкемлестирилген байрам кешеси Өзбекстан Республикасы Президенти Ш.Мирзиёевтиң Жасларға жоллаған байрамы қутлықлаўы менен ашып берилди ҳәмде 2017-2018 оқыў жылы даўамында ҳәм байрам илажларында белсендилик пенен қатнасқан жасларға «Ҳүрмет жарлығы» менен баҳалы саўғалары тапсырылды.

«Жаслар күни» байрамы районлық мәденият тараўы хызметкерлериниң байрамға арналған гала концерти менен даўам етти.

 «Жаслар күни – темеки ҳәм спиртли ишимликлерсиз күн» ураны акциясы шеңберинде, жаслар арасында темеки ҳәм спиртли ишимликлер ишилиўине қарсы үгит-нәсият илажлары, районда әскерий хызметти өтеп келген жаслар менен «Мард ўғлон» темасында «Ўатанды корғаў – үлкен жуўапкершилик» түсинигин үгит-нәсиятлаў бойынша дөнгелек стол сәўбетлери өткерилди.

«Жаслар күни»не бағышланып өткерилген илажлар менен таңлаўлар, жарыслар ҳәм көргизбелер жеңимпазлары шөлкемлестириўшилер тәрепинен баҳалы саўғалар менен сыйлықланды.

Бөлимлер