Қоңыраттан мүрәжат: Нөкиске дейин такси 25 мың сўм!

Қоңыраттан және бир мүрәжат келди.

«Ассалаўма алейкум, сизге айтажағым Қоңырат пенен Нөкис арасындағы таксилердиң баҳасы күннен-күнге қымбатлап баратыр. Буған арзыйтуғын себеп жоқ. Метан газ қымбатлаған жоқ, Қоңыраттың жолы тегис. Нөкиске баратуғын оқыўшы жаслар көп болғаны ушын сөйтип баҳаны көтерип атыр ма? Негизи өзлериниң жөнелис бойынша төлеми 15400 ямаса 16000 сўмнан аспайды, бирақ олар (таксистлер) 25 мың сўмнан түспей турып алады. Сизлерден өтинишим соны шешип берсеңиз. Жолды сатып алған баслығына хабар берсеңиз, қол астындағы таксистлерди қадағаласа».

Усы жылдың 1-15-август күнлер аралығында жоқары оқыў орынларында кириў имтиҳанлары болыўын есапқа алсақ, бул мүражатты тек ғана Қоңырат-Нөкис жолын тендерде утып алған исбилерменниң бир өзи көрип шығыўы азлық етеди.

Егер тендерде утқан юридикалық шахс жоқарыдағы мүрәжатты итибарсыз қалдырса, Өзбекстан автомобиль ҳәм дәрья транспорты агентлигиниң Қарақақалпақстан Республикасы басқармасы бар. Басқарма менен байланысып, туўрыдан-туўры мүрәжат етиўди қәлеўшилер ушын:

Өзбекстан автомобиль ҳәм дәрья транспорты агентлигиниң Қарақалпақстан Республикасы басқармасы баслығы ў.ў.а. Бердиев Аллаберген Калилаевич.

E-mail: qoraqalpoqdep@autotrans.uz

Мәнзили: Нөкис қаласы Төрткүл гүзәри 1-А үй. 34,79,8-жөнелисли такси жолы. Бағдар Автотех салоны.

Басқармаға ҳеш ойланбай мүрәжат етиўге болады. Себеби, Өзбекстан автомобиль ҳәм дәрья транспорты агентлигиниң 2017-жыл 1-майдағы 128-санлы буйрығының 13-қосымшасына муўапық, Өзбекстан автомобиль ҳәм дәрья транспорты агентлигиниң аймақлық басқармалары ҳаққындағы нызамның «и» бәнтинде – аймақлық басқарма автомобиль транспортында жүк ҳәм жолаўшылар тасыўды лицензиялаўды шөлкемлестириў, лицензиянтлар тәрепинен лицензия талаплары ҳәм шәртлери орынланыўын қадағалаў мәселелерин шешеди. 3-бөлимине муўапық, автомобиль ҳәм дәрья транспорты хызметлери базарында базар қатнасықларын ҳәм бәсекилик орталығын раўажландырыў, жолаўшыларға хызмет көрсетиў мәдениятын ҳәм сапасын асырыў автотранспорт хызметлери сервисин кеңейтиў ушын қолайлы шәртнамаларды тәмийинлеў тараўында: тасыўшылардың тасыў жөнелислериндеги искерлигин, тендер шәртнамаларын орынланыўын, жол ҳәрекети қәўипсизлигин қадағалайды, - делинген.

Егер бул Басқарма да жоқарыдағы мүрәжатты көрип шықпаса, Өзбекстан Республикасы Меншиклестирилген кәрханаларға көмеклесиў ҳәм бәсекиликти раўажландырыў комитетиниң тутуныўшылар ҳуқықларын қорғаў бөлими бар.

Телефон: 0 (361) 222-02-87, 0 (361) 222-30-03 E-mail:  karakalp@gki.uz

Сондай-ақ, ҳәзирги ўақытта тутыныўшылардың ҳуқықларын қорғаўда нәтийжели жумыс ислеп турған – Өзбекстан тутыныўшылар ҳуқықларын қорғаў жәмийетлери федерациясы бар. Телефон: (361) 222-92-92 E-mail: qr@potreb.uz.

Булар да мүрәжатты көрип шықпаса, жолларда «моменттен пайдаланып» баҳаны себепсиз кескин көтерип, дүньяның изине түскен таксистлерге инсапты өзиңизге берсин, деймиз.  

Жуўмақ орнына

Мүрәжат жоллаған адамға транспорт агентлигиниң ҳәм Қоңыраттың жолын сатып алған исбилерменниң қол телефонларын берип, оларға қоныраў етип көриң дегенимде, «Қоңырат өзи киттай қала, таксистлер мени жек көрип қалады, мен өзимди емес, ертең экзаменге баратуғын жасларды ойлап сизге хабарластым», - деди.

Тек Қоңырат емес пүткил Қарақалпақстан киттай. Ҳәмме бир-биреўге ағайин, таныс, жора-жолдас.

 

Лола Қаллыханова, makan.uz

журналист

Бөлимлер