ҚМУ сыртқы бөлиминде оқыў басланды

Быйылғы оқыў жылы бурынғыларынан парқ етип Өзбекстан Республикасы Президентиниң 2018-жыл 4-июньдағы ПҚ-3769 санлы «2018/2019 оқыў жылында Өзбекстан Республикасының жоқары оқыў орынларына оқыўға қабыллаў ҳаққында» ғы қарарына муўапық жоқары оқыў орынларының сыртқы ҳәм кешки билим бериў бөлимлерине улыўма қабыллаў квотасында 2018/2019 оқыў жылы  ушын тастыйықланған жәми бакалавриатқа улыўма қабыллаў квотасының 30 процентине шекемги болған муғдарында сыртқы бөлимге студентлерди  қабыллаў белгиленген.

Усы қарарға тийкарланып 2018-жыл 15-октябрь күни Бердақ атындағы Қарақалпақ мәмлекетлик университетиниң сыртқы бөлими студентлери де оқыўды баслады. Усыған байланыслы Тәбияттаныў факультетинде сыртқы бөлим студентлери менен ушырасыў болып өтти. Ушырасыўға факультет деканы, декан орынбасарлары, кафедра баслықлары ҳәм профессор-оқытыўшылар қатнасты. Факультетте биология, экология ҳәм геодезия, картография ҳәм кадастр тәлим бағдарлары бойынша сыртқы бөлимге жәми 125 студент қабыл етилди. Мәжилисти факультет деканы доц. А.Есимбетов алып барды ҳәм студентлерге университет ҳәм факультет ҳаққында кеңнен таныстырды. Сондай-ақ, университет ишки тәртип қағыйдалары ҳаққында  түсиндирди. Буннан соң басқада профессор-оқытыўшылар шығып сөйледи ҳәм сыртқы бөлим студентлерине билим алыўы ушын университетте жаратылған шараятлар менен таныстырды.

Сыртқы бөлим студентелрине жаңадан басланып атырған оқыўларында тасқын табыслар тилеймиз.

 

Н.Ембергенов, Г.Ходжаевалар

География кафедрасы доцентлери

Бөлимлер