1-Қарақалпақстан округлик сайлаў комиссиясының гезектеги мәжилиси болып өтти

Усы жылдың 13-октябрь күни Өзбекистан Республикасы Президентин сайлаўды сәўлелендириў бойынша Республикалық баспасөз орайында шөлкемлестирилген Өзбекистан Республикасы Орайлық сайлаў комиссиясының онлайн мәжилисинде көрип шығылған мәселелер тийкарында 1-Қарақалпақстан округлик сайлаў комиссиясының гезектеги мәжилиси болып өтти. Оған округлик комиссияның ағзалары, сиясий партиялардың ҳәм ғалаба хабар қуралларының ўәкиллери қатнасты.

Мәжилисте участкалық сайлаў комиссияларының жумысларын нәтийжели шөлкемлестириў, участкалардың сайлаўға таярлық жумысларын ҳәрекеттеги нызамшылық талапларына муўапық алып барыў, сайлаўға таярлық көриў ҳәм оны өткериў менен байланыслы жумысларда ашық-айдынлықты ҳәм жәриялылықты тәмийинлеў сыяқлы мәселелер туўралы кең түрде сөз болды.

  1-Қарақалпақстан округлик сайлаў комиссиясының баслығы У.Жалменовтың атап өткениндей, бүгинги күнде сайлаўға таярлық жумыслары қызғын түс алмақта. Бул бағдарда айрықша жуўапкершилик талап ететуғын мәселелерден бири - участкалық сайлаў комиссияларының жеке қурамын тастыйықлаў болып табылады.

Сайлаўға таярлық көриў ҳәм оны өткериўде ашық-айдынлықты ҳәм жәриялылықты тәмийинлеў ўазыйпалары ҳаққында округлик сайлаў комиссиясы жанындағы Баспасөз орайының баслығы Д.Қурбаниязов кең түрде шығып сөйледи. Атап өтилгениндей, сайлаўшылардың ҳуқықый билимлерин жетилистириўде, сайлаўға таярлық көриў ҳәм оны өткериў менен байланыслы жумысларды сәўлелендириўде ғалаба хабар қураллары хызметкерлерине айрықша жуўапкершилик жүкленеди. Усыны есапқа алып, бүгинги күнге дейин ғалаба хабар қуралларының 70 ке жақын хызметкери дизимге алынған. Сондай-ақ, ислеп шығылған арнаўлы илажлар жобасы тийкарында белгили илимпазлар, жәмийетлик ғайраткерлер, ҳуқықтаныўшы қәнигелер қатнасында ғалаба хабар қуралларында шығыўлар шөлкемлестирилмекте.

Мәжилисте участкалық сайлаў комиссиялары ағзаларының ҳуқықый билимлерин жетилистириў, олардың ҳуқықый мәдениятын арттырыў, сайлаў өткерилетуғын орынларда барлық қолайлы шараятлар жаратыў сыяқлы мәселелер бойынша алда турған ўазыйпаларға айрықша итибар қаратылды.

ҚХА

Бөлимлер