Қайсы сәнеге шекем өз басымшалық пенен қурылған имәратларға мүлик ҳуқуқы берилмейди? Усы ҳәм басқада сораўларға жуўаплар

Хабарыңыз бар бугинги күнде қала ҳәм районларда мәмлекетлик хызметлер орайы жумыс алып бармақта. Демек, бул орайлар тәрепинен әмелге асырылып атырған ислер нәтийжелиги қай дәрежеде. Нөкис районы мәмлекетлик хызметлер орайы мысалында сораўларға жуўап аламыз.


Бугинги күнде Нөкис районы мәмлекетлик хызметлер орайында неше мәмлекетлик хызметлер көрсетилип келинбекте?


- Ҳәзирги ўақытта Нөкис районы мәмлекетлик хызметлер орайы арқалы 70 ден аслам мәмлекетлик хызметлер көрсетилип келинбекте.

Ɵз басымшалық пенен қурылған көшпес мүлкке ийелик етиў ҳуқықын бериўши районлық комиссия мақсети не?


- Ɵз басымшалық пенен қурылған көшпес мүлкке ийелик етиў ҳуқықын бериўши районлық комиссия шөлкемлестирилди. Комиссияға район ҳәкимлигиниң санаатты раўажландырыў, капитал қурылыс, коммуникациялар ҳәм коммунал хожалығы бойынша орынбасары басшылық етип, комиссия ағзалары сыпатында Нөкис районы жер ресурслары ҳәм мәмлекетлик кадастры бөлими, Қарақалпақстан Республикасы жер дүзиў ҳәм көшпес мүлк кадастры мәмлекетлик кәрханасы Нөкис районы филиалы, Нөкис районы қурылыс бөлими, Нөкис районы ишки ислер бөлими, Нөкис районы өрт қәўипсизлиги бөлими, Нөкис районы мәмлекетлик салық инспекциясы, Нөкис районы Экология ҳәм қоршаған орталықты қорғаў комитетиниң Нөкис районы инспекциясы, Нөкис районы мәмлекетлик санитария эпидемиология бақлаў орайы, Нөкис районы адиллик бөлими бириктирилди.
 Өз басымшалық пенен қурылған турақ жайларға болған мүлк ҳуқықын тән алыў бойынша, пуқараларымыз Мәмлекетлик хызметлер орайына район ҳәкими атына арза менен мурәжат етеди.


Арзаға қосымша, арза бериўшиниң паспорт нусқасы, шаңарақ ағзары хаққында ҳәм жер участкасына ийелик қылған мүддетлери, имәрат қурылған ўақты туўрысында пуқаралардың өзин-өзи басқарыў органы мағлыўматнамасы талап етиледи.
Арза тийисли тәртипте комиссиянын исши органы Қарақалпақстан Республикасы жер дүзиў ҳәм көшпес мүлк кадастры мәмлекетлик кәрханасы Нөкис районы филиалына жибериледи.


Исши орган мүрәжаат етиўшиниң анкета ҳәм қосымша ҳүжжетлери келип тускен күннен баслап, үш ис күни ишинде өзбасымшалық пенен қурылған көшпес мүлктиң техник планын таярлайды ҳәм анкетасына қосып, жоқарыдағы комиссия ағзаларына электрон бирге ислесиў системасы арқалы жибереди.

Неше  күн ишинде үйренип шығылады?


 - Комиссия тийисли тәртипте улыўма 11-күн ишинде үйренип шығады ҳәм мүлк ҳуқуқын тән алыў мүмкин деп табылған болса комиссия исши органы тийисли тәртипте далалатнама дүзип бир мәртелик жыйым пулын төлеў ушын электрон тәртипте есап фактурасын жибереди.
Мәмлекетлик хызметлер орайы есап фактура келип түкен күннен баслап 1 саат ишинде мүрәжаат етиўшиге бул ҳаққында хабар береди.
Бунда бир мәртелик жыйым төлем суммасы ең кем айлық ис ҳақының 5 есеси муғдарында болып белгиленген.
Мүрәжаат етиўши тәрепинен бир мәртелик жыйым төлеми төленгеннен кейин 2 календарь күни ишинде, өз басымшалық пенен қурылған турақ жайларға болған мүлк ҳуқыкын тән алыў бойынша район ҳәкиминиң қарары жойбарын таярлайды ҳәм тастыйықлаў ушын район ҳәкимине усынады.
Район ҳәкиминиң комиссия исши органы тәрепинен таярланған қарар жойбары усынылған күнен баслап 2 жумыс күнинде  қабыл қылынады.
Егер өзбасымшалық пенен қурылған имаратқа болған мүлк ҳуқықын бериў мүмкин емес деп табылғанда, комиссия исши органы кадастр тәрепинен, мүлк ҳуқықы берилмеў себеби көрсетилген хат таярлайды ҳәм акттың нусқасын қосып электрон система арқалы Мәмлекетлик хызметлер орайына жибереди.

 Қайсы сәнеге шекем өз басымшалық пенен қурылған имәратларға мүлик ҳуқуқы берилмейди?


- Қарарға тийкар 2018-жыл 20-апрельден соң өз басымшалық пенен қурылған имәратларға мүлик ҳуқуқы берилмейди ҳәмде аксия мүддети 2019-жылдың 1-май күнине шекем даўам етеди.
Сонлықтан пуқараларымызды өз басымшалық пенен қурылған турақ жайларға болған мүлк ҳуқыкын тән алыў бойынша тийисли тәртипте Мәмлекетлик хызметлер орайына келип хабарласыўға болады.

     Б.Ауезов
     Нөкис районы мәмлекетлик хызметлер орайы директоры.

Бөлимлер