1-Қарақалпақстан округлик сайлаў комиссиясында баспасөз конференциясы болып өтти

Усы жылы 4-декабрь күни болып өтетуғын Өзбекистан Республикасы Президентин сайлаўға таярлық көриў ҳәм оны өткериў менен байланыслы илажлар қызғын түске енди.

14-октябрь күни 1-Қарақалпақстан округлик сайлаў комиссиясы жанындағы Баспасөз орайында Өзбекистан Республикасы Президенти сайлаўын жарытып бериўши ғалаба хабар қураллары ўәкиллери ушын баспасөз конференциясы болып өтти.

Оны 1-Қарақалпақстан округлик комиссиясы жанындағы Баспасөз орайының басшысы Д.Қурбаниязов кирис сөз бенен ашты.

Илажда округлик сайлаў комиссиясының баслығы У.Жалменов шығып сөйлеп, Өзбекистан Республикасы Президентин сайлаў кампаниясындағы бүгинги күнге шекемги әмелге асырылған илажлар, алдағы ўазыйпалар туўралы кең түрде мағлыўмат берди.

Атап өтилгениндей, Қарақалпақстан Республикасында сайлаўшылардың улыўма саны 1 миллион 188 мың 763 адамды қурайды. Соннан, 27974 и сайлаўға биринши мәрте қатнасыўы күтилип атырған жасларымыздан ибарат.

1-Қарақалпақстан округлик сайлаў комиссиясы тәрепинен бүгинги күнде сайлаўға таярлық көриў бойынша бир қанша илажлар әмелге асырылған. Атап айтқанда, округлик сайлаў комиссиясының сайлаў кампаниясы дәўиринде әмелге асыратуғын тийкарғы илажлары бойынша бағдарламасы ислеп шығылып, комиссия ағзалары арасындағы ўазыйпалар бөлистирилди. Округлик сайлаў комиссиясы жанынан Баспасөз орайы дүзилип, жумыс алып бармақта. Сайлаўға таярлықтың барысы ҳәм оның ашық-айдынлығын тәмийинлеў мақсетинде бүгинги күнге дейин 70 ке шамалас журналист ҳәм техникалық хызметкерлер дизимнен өткерилди. Бурын хабар етилгениндей, Қарақалпақстан Республикасында Өзбекистан Республикасы Президенти сайлаўын өткериўши 590 сайлаў участкасы дүзилди ҳәм олардың жайласқан мәнзили, шегаралары ҳаққындағы мағлыўматлар республикалық газеталарда жәрияланды.

Ҳәзирги ўақытта участкалық сайлаў комиссияларының жеке қурамы бойынша районлық ҳәм қалалық ҳәкимликлериниң усыныслары көрип шығылмақта. Бунда, участка сайлаў комиссияларының қурамына тәжирийбели, исшең, инталы, партиясыз, қалыс пикирлейтуғын пуқаралар қамтып алынбақта.

Алдағы ўақытлары Өзбекистан Республикасы Президенти сайлаўын өткериўши участкалық сайлаў комиссияларының жумысын нәтийжели шөлкемлестириўге арналған семинар-тренинглер өткериў режелестирилген.

Илажда ғалаба хабар қуралларының хызметкерлери өзлерин қызықтырған сораўларға жуўаплар алды.

ҚХА

Бөлимлер