Мәмлекетлик хызметлерин көрсетиў тараўындағы нызам ҳүжжетлерин бузыў жуўапкершиликке себеп болады

Мәмлекетимизде мәмлекетлик хызметлер көрсетиў системасы изшиллик пенен жетилистирилмекте ҳәм модернизация қылынбақта, бул халықтың өмир сапасын, инвестиция орталығын жақсылаў ҳәм бизнести раўажландырыў имканятын береди.

Өзбекистан Республикасы Президентиниң «Халыққа мәмлекетлик хызметлерин көрсетиўдиң миллий системасын түптен реформалаў ис иләжлары ҳаққында»ғы Пәрманын орынлаў мақсетинде Министрлер Кабинетиниң 2018-жыл 31-январдағы 70-санлы Қарары менен «Өзбекстан Республикасы Әдиллик министрлиги жанындағы Мәмлекетлик хызметлер агентлиги ҳаққында»ғы Реже тастыйықланды.

Усы Реже менен  физикалық ҳәм юридикалық шахсларға мәмлекетлик хызметлерин көрсетиў тараўында бирден бир сиясатты әмелге асырыў, артықша ҳәкимшилик тәртиплерди сапластырыў есабына мәмлекетлик хызметлер көрсетиў тәртибин жетилистириў, электрон бирге ислесиўди раўажландырыў, мәмлекетлик хызметлерин көрсетиў тараўында, соның менен бирге тийисли мәлимлеме системалары, ресурслары ҳәм мағлыўматлар базаларын енгизиў бойынша мәмлекетлик органлар ҳәм басқа шөлкемлер искерлигин қадағалаў ҳәм өнимдарлығын баҳалаў агентликтиң тийкарғы ўазыйпаларының бири етип белгиленди.

Мәмлекетлик хызметлер агентлиги Қарақалпақстан Респбуликасы басқармасы район (қала) мәмлекетлик хызметлер орайларынан келип түскен ўәкилликли органлар тәрепинен жол қойылған нызам бузылыўы жағдайлары бойынша арнаўлы хабарлар ҳәм орайларда өткерилген мониторинг нәтийжесинде анықланған нызам бузылыўы жағдайлары бойынша тийисли ўәкилликли органларға тәсир шаралары қолланып келинбекте.

Буннан тысқары 2018 жыл 24 июль күни Өзбекстан Республикасы Ҳәкимшилик жуўапкершилик ҳаққындағы кодексине 2155 ҳәм 2455 статьялары киритилип, Мәмлекетлик хызметлер агентлигине ўәкилликлер берилди.

Яғный, Мәмлекет хызметлерин көрсетиў тараўындағы нызам ҳүжжетлериниң арза бериўшиден мүрәжатты қабыл етиўден бас тартқанлығы, мәмлекетлик хызметлерди көрсетиў ўақтында мүрәжатларды көрип шығыў тәртибин ҳәм мүддетлерин бузғанлығы, арза бериўшиден нызам ҳүжжетлеринде нәзерде тутылмаған ҳүжжетлерди талап етип алғанлығы, мәмлекетлик хызметлерин көрсетиў тараўында ўәкилликли мәмлекетлик органының нызамлы талабын орынламағанлығы ушын лаўазымлы шахсларға ҳәм хызметкерлерге ең кем ис ҳақының үш есесинен бес есесине шекемги муғдарда жәрийма салыўға себеп болады.

Тап сондай ҳуқық бузарлық ҳәкимшилик жаза шарасы қолланылғаннан соң бир жыл даўамында тәкрар исленген болса лаўазымлы шахсларға ҳәм хызметкерлерге ең кем ис ҳақының бес есесинен он есесине шекемги муғдарда жәрийма салыўға себеп болады.

Өзбекстан Республикасы Әдиллик министрлиги жанындағы Мәмлекетлик хызметлер агентлиги органлары атынан ҳәкимшилик ҳуқықбузарлықлар ҳаққындағы ислерди көрип шығыўға ҳәм жәрийма спатындағы ҳәкимшилик жаза шараларын қоллаўға Өзбекстан Республикасы Әдиллик министрлиги жанындағы Мәмлекетлик хызметлер агентлиги директоры, оның орынбасары ҳәм аймақлық басқарма баслықлар ҳәм оның орынбасарлары ҳақлы етип белгиленди.

Яғный, басқарма тәрепинен усы жылдың жети айы даўамында жәми 6500 ден аслам нызам бузылыўы жағдайлары анықланды. Соннан ең көп нызам бузылыўы жағдайларына тоқталып өтетуғын болсақ 4564 жағдай өз басымшалық пенен қурылыған имаратқа қарата мүлк ҳуқықын тән алыў бойынша, 403 жағдай балаларды мәмлекетлик мектепке шекемги билимлендириў мәкемелерине қабыл етиў бойынша, 238 жағдай дәри өнимлери ҳәм медицина буйымларын усақлап реализация етиў ушын лицензия бериў бойынша ҳәм тағы басқалар.

Анықланған нызам бузылыўы жағдайларын сапластырыў, жуўаплы хызметкерлердиң интизамий жуўапкершилик мәселесин көрип шығыў ҳәм келешекте мәмлекетлик хызметлерин тез ҳәм анық көрсетиў ҳаққында ўәкилликли ораганларға 60 тан аслам усыныс, 24 ескертиў ҳәм жуўаплы хызметкерлерди ҳәкимшилик жуўапкершиликке тартыў бойынша тийисли судларға 22 усыныс киритилди.

Киритилген тәсир шалар нәтийжесинде 32 жуўаплы хызметкерлер интизамий жуўапкершиликке ҳәм 22 жуўаплы хызметкерлер судлар тәрепинен ҳәкимшилик жуўапкершиликке тартылып, пуқаралар ҳәм исбилерменлердиң нызамлы ҳуқықлары тикленбекте.

Сондай-ақ, анықланған нызам бузылыўы жағдайлары бойынша
2018-жыл 24-июль күнинен усы күнге шекемги аралықта Мәмлекетлик хызметлер агентлиги Қарақалпақстан Республикасы басқармасының қарарларына тийкар 110 нан аслам лаўазымлы ҳәм жуўаплы хызметкерлер ҳәкимшилик жәриймаға тартылды.

Жоқарыдағылардан келип шығып ўәкилликли уйымларды нызам бузылыўына жол қоймаўға, тез ҳәм қолай мәмлекетлик хызметлерин көрсетиўге шақырып қаламыз.

 

Мәмлекетлик хызметлер агентлиги Қарақалпақстан Республикасы басқармасы Мәмлекетлик органлар ҳәм басқа шөлкемлер тәрепинен мәмлекетлик хызметлер көрсетилиўи үстинен қадағалаў бөлим баслығы Досымбетов Женис Бахтиярович

Бөлимлер