ҚMУ да ата-аналар менен ушырасыў болып өтти

Усы жылдың 16-декабрь күни Қарақалпақ филологиясы факультетинде студентлердиң ата-аналары менен ушырасыў өткерилди. Онда факультеттиң профессор-оқытыўшылары, студентлер ҳәм олардың ата-аналары сондай-ақ, жәмийетлик пенен бирге ислесиўши  шөлкем ўәкиллери  қатнасты.       Ушырасыўды шөлкемлестириўден тийкарғы мақсет усы жылы студентлер қатарына қосылған жаслардың ата-аналары менен жақыннан байланыс орнатыў, студентлерди университеттиң ишки тәртип-қағыйдалары, студенттиң әдеп-икрамлылық қағыйдалары менен таныстырыў, оқыў ҳәм жәмийетлик жумысларда қатнасы мәселеси сондай-ақ, елимизде жасларға тийисли мәмлекетлик сиясатты әмелге асырылыўын тәмийинлеўде нәтийжели бирге ислесиўди жолға қойыўдан ибарат.

Бәршемизге мәлим, 2018-жыл 26-сентябрьде «Жоқары оқыў орынларында студентлердиң билимин қадағалаў ҳәм баҳалаў системасы ҳаққында»ғы Нызам қабыл етилди ҳәм усы нызам тийкарында Жоқары ҳәм орта арнаўли билимлендириў министрлигиниң аранаўлы буйрығы шықты.

 

Ушырасыў даўамында нызамда нәзерде тутылған өзгерислерди яғный, студентлердиң билимин қадағалаў ҳәм баҳалаўдағы жаңа система ҳаққында 1-курс студентлер ҳәм олардың ата-аналарына кең түрде түсиндириўге айрықша дыққат аўдарылды.

 

Жаслар – келешек қурыўшылары. Сонлықтан да, олардың өз кәсибиниң жетик маманы, заман сай кадрлар болып жетилисиўи оқыў орынлары ҳәм кең жәмийетликтиң тығыз бирге ислесиўи арқалы әмелге асырылады. Бул ўазыйпа мектеп ҳәм орта арнаўлы билимлендириў мәкемелери менен қатар, жоқары оқыў орынларында да үлкен жуўапкершилик жүклейди ҳәм талап қояды. Усы жуўапкершиликли ўазыйпаны талап дәрежесинде алып барыўда ата-аналар менен өткерилип атырған усындай илажлардың әҳмийети үлкен.

Ушырасыў соңында ата-аналар ҳәм студентлер сөз етилген мәселелер бойынша өзлерин қызықтырған сораўлары берди ҳәм пикир-усынысларын билдирди.

З.Жуманов,

Қарақалпақ филологиясы факультети декан орынбасары

Бөлимлер