Қарақалпақстанлы 3 студент жас Өзбекстан Республикасы хабар технологиялары ҳәм коммуникацияларды раўажландырыў Министрлигиниӊ стипендия жеӊимпазлары болды

Бүгин Ташкент  қаласында Өзбекстан Республикасы хабар технологиялары ҳәм коммуникацияларды раўажландырыў Министрлиги тәрепинен шөлкемлестирилген 2018-2019-оқыў жылы ушын стипендия ийелерин сыйлықлаў мәрәсими болып өтти. 


Қарақалпақстан Республикасынан ТАТУ Нөкис филиалыныӊ студентлери Давид Конарбаев ҳәм Улбосын Сапарова, ТАТУ Нөкис филиалы жанындағы Академиялық лицей оқыўшысы Дилфуза Исмаиловалар жеӊимпаз деп  табылды. 


-«Бүгин бизлерге стипендияныӊ арнаўлы гуўалығы тапсырылды. Өқыў даўамында рейтинг көрсеткишлери жоқары болған,жәмийетлик жумысларда белсенди қатнасып атырған, республика ҳәм халықаралық пән олимиада таӊлаўларда жеӊимпаз болған әсиресе, информация–коммуникация технология тараўында жаӊа жойбарлар ислеп,илимий излениўлер алып барып атырған бир топар студент жаслар сыйлықландық. Биз буннан кейинде өз бағдарымыз бойынша жаӊа инновациялық жойбарларымызды әмелиятқа енгизиўге ҳәрекет етемиз»- дейди, стипендия ийеси Давид Конарбаев биз бенен онлине сәўбетте. 
Биз барлық стипендия ийелерин табыслары менен қутлықлаймыз! 


Мағлыўмат сыпатында атап өтиўимиз лазым Өзбекстан Республикасы бойынша  2018-2019-оқыў жылы ушын жәми  22  жас  Өзбекстан Республикасы хабар технологиялары ҳәм коммуникацияларды раўажландырыў Министрлиги стипендия ийелерине айланды. 

ТАТУ Нөкис филиалы Баспасөз хызмети

Бөлимлер