И.В.Савицкий музейинен хат

И.В.Савицкий музейинен хат

Мағлыўмат zaman.uz сайтынан алынды.

Биз билемиз «Саҳра лувры» деп аталған И.В.Савицкий атындағы мәмлекетлик көркем өнер музейи бүгинги күни дүнья итибарында. Усындай итибарлы орынның әтирапындағы орынсыз ҳәрекетлерден тәшўишке түсип атырған музей хызметкерлери Ишки ислер министрлиги, Нөкис қаласы ҳәкимият басшыларынан әмелий жәрдем бериўин сорап хат жоллаған. Бул ҳаққында zaman.uzға музей хызметкерлери хабар берди. "Хаттан соң «ППС» келди «ГАИ» нәўбетши қойды, бирақ нәўбетшилер түстен соң тек 2 саат, 16:00 ҳәм 18:00 арасында турады".

 Нәзереңизге усы хатты усынамыз ҳәм тийисли мәкемелерден бул мәселеге итибар қаратыўын сорап қаламыз.

«Қарақалпақстан Республикасының сырт ел мийманлары келиўи бойынша ең алды қатарлардан орын алған, дүнья жүзине белгили мәденият орайы есапланған Қарақалпақстан Республикасы И.В.Савицкий атындағы мәмлекетлик көркем өнер музейи әтирапында ушырасып атырған базы бир унамсыз жағдайлар, мәдениятымызға жат нәрселер, атап айтқанда, жаслар сейили музей аймағына келген ўақтында жасы үлкен апайлардың жас шаңарақ астанасына енди қәдем қойып атырған келин-кийеўдиң алдынан шығып бул аймақтың хожайыны сыяқлы салық салып, белгиленген сумма айтып, егер айтылған сол сумма берилмесе көкиректе турмайтуғын жаман гәплер (ғарғыс) айтқанларын көпшилигимиз көрип-еситип жүргенлигимиз рас. Буннан қалаберсе, сейилге келген айырым жаслардың мәдениятымызға жат ис ҳәрекетлери, атап айтқанда спиртли ишимликлер ишип мәс ҳалында музейимизге жақын жерде жайласқан «I Love Nukus» жазыўын бир неше мәртебе сындырып кетип атырғанлығы аянышлы жағдай.

 Қарақалпақстан Республикасы И.В.Савицкий атындағы мәмлекетлик көркем өнер музейи әтирапын Қарақалпақстан Республикасы абаданластырыў кәрханасы тәрепинен көклемзарлыққа айландырылған жер майданлар ҳәр күни тәртипке салынып киятыр.

Деген менен, той сейилине шыққан жаслардың музей әтирапында сейил етиўи күннен-күнге көбейип, ҳәр қыйлы шығындыларды таслап, музей әтирапын патаслап атыр.

Музей алды жер майданларына егилген газонлардың үстинде отырыў, басқылап кетиў, ушырылған кептерлериниң пәрлериниң жайрап қалыўы, рухсатсыз саўда сатық ислеўи, шийше, баклашкалардың таслап кетилиўи нәтийжесинде газонлардың өсиўине кесент етпекте, және музейге келиўши мийманлар ушын ажыратылған автомашина қойыў орнында (парковка стоянка) той сейили машиналарын қойыў ҳәрекетлери ушыраспақта.

Бундай той сейилиндеги қолайсыз ҳәрекетлер музейимизге келиўши мийманларға ҳәм шет ел туристлерине хызмет көрсетиў сапасын төменлетиўге алып келмекте.

Сонлықтан, Сизден, ишки ислер министрлиги, Нөкис қаласы ҳәкимият басшыларынан ҳәм усы той сейилиндеги қолайсыз ис ҳәрекетлерди тийисли мәкеме басшылары менен биргеликте тоқтатыўға ҳәм автомашина қойыў орнында (парковка стоянка) басқа автомашиналар кириў қадаған етиледи атамасындағы белгилер қойылыўына әмелий жәрдем бериўиңизди соранамыз».

Бөлимлер