Умра зыяратынан келген 46 жерлеслеримиз күтип алынды

Алдын хабар бергенимиздей усы жылы 14-март күни Республикамыздан 46 пуқара Умра зияратын ада етиў ушын жөнеп кеткен еди.

Ҳүкиметимиз тәрепинен жаратылған имканиятлар ҳәм қолайлықлардан нәтийжели пайдаланып, Умра әмеллерин ада етип, усы жылы 25-март күни елимизге жетип келди. Оларды Нөкис халықара аэропортынан Қарақалпақстан Республикасы Министрлер Кеңеси, Қарақалпақстан мусылманлары қазыяты, Муҳаммад ибн Ахмад ал Беруний медресеси, имам-хатиблер ҳәм басқа да мекеме, шөлкем ўәкиллери, ғалаба хабар қураллары хызметкерлери ҳәм умрашылардың жақын туўысқанлары күтип алды.

«… Умра зияраты әмеллерин ада етиўде үлкен имканиятларды ҳәм қолайлықларды жаратып берген ҳүрметли Журтбасшымызға, ел басшыларына үлкен рахмет. Мадина ҳәм Мекке қалаларында зияратшылар ушын жаратылған имканиятлар ҳәм қолайлықлардың жаратылыўы, транспорт хызметлери ҳәммеси кеўилдегидей. Буннан умрашыларымыз миннетдар. Ибадат әмеллеринде елимиздиң тынышлығы буннанда беккем ҳәм парахат болыўы ушын дуўалар еттик», деп өз миннетдаршылығын билдирди шымбайлы Алимов Жарылқаған аға.

Умрашыларымыз өзлерин күтип алыўда ҳәм шығарып салыўда инсаныйлық жәрдемлерин берген Нөкис халықара аэропорты ҳәм жол ҳәрекети қәўипсизлиги басқармасы мийнет жәмәәтине өзлериниң миннетдаршылығын билдирди.

Қарақалпақстан мусылманлары қазыяты.

Бөлимлер