Социаллық шериклик бойынша жәмийетлик комиссияның ўазыйпалары қандай?

Нөкисте Қарақалпақстан Республикасы Жоқарғы Кеңеси жанындағы социаллық шериклик бойынша жәмийетлик комиссия тәрепинен өткен жылы әмелге асырылған жумыслардың жуўмағы ҳәм быйылғы жылға белгиленген ўазыйпалар, сондай-ақӨзбекстан Республикасы Олий Мажлиси жанындағы мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларын қоллап-қуўатлаў жәмийетлик фонды тәрепинен жәрияланған «Ҳәрекетлер стратегиясы, «Жедел инвестициялар ҳәм социаллық раўажланыў жылы» Мәмлекетлик бағдарламасын орынлаўда МКШлардың белсендилигин қоллап-қуўатлаў» темасындағы Мәмлекетлик грант-таңлаўларына бағышланған мәжилис болып өтти.

Илажды Қарақалпақстан Республикасы Жоқарғы Кеңесиниң комитет баслығы С.Турманов басқарып барды.

 

Өзбекстан Республикасы Олий Мажлиси Сенатының комитет баслығы Б.Матмуратов шығып сөйлеп,  Олий Мажлис жанындағы мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларын қоллап-қуўатлаў жәмийетлик қоры тәрепинен жәрияланған грант-таңлаўларының әҳмийетине тоқтап өтти.

Атап өтилгениндей, соңғы жыллары елимизде Президентимиздиң басшылығында демократиялық өзгерислерди әмелге асырыў, мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларын қоллап-қуўатлаў бағдарында кең көлемли илажлар әмелге асырылмақта. Бунда Өзбекстан Республикасы Президентиниң 2018-жыл 4-майдағы «Елимизде демократиялық жаңалаў процесинде пуқаралық жәмийети институтларының ролин түп-тийкарынан арттырыў илажлары ҳаққында» ғы Пәрманы олардың социаллық белсендилигин арттырыўда айрықша әҳмийетке ийе болды. Бул ҳүжжет мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларының ролин арттырыў, олардың мәмлекетлик ҳәкимият ҳәм басқарыў уйымлары менен бирге ислесиўин беккемлеўге тийкар жаратады.

2017-2021-жылларда Өзбекстан Республикасын раўажландырыўдың бес тийкарғы бағдарламасы бойынша Ҳәрекетлер стратегиясында белгилеп берилген ўазыйпаларды басқышпа-басқыш әмелге асырыў мақсетинде Өзбекстан Республикасы Президенти жанында Пуқаралық жәмийетин раўажландырыў бойынша мәсләҳәт кеңеси, Қарақалпақстан Республикасы Жоқарғы Кеңеси жанында мәмлекетлик емес коммерциялық емес шөлкемлерди ҳәм пуқаралық жәмийетиниң басқа да институтлары мәселелери бойынша турақлы комиссия ҳәм жәмийетлик қор шөлкемлестирилип, олардың тийкарғы ўазыйпалары белгилеп берилди. Бул өз гезегинде мәмлекетлик емес коммерциялық емес шөлкемлерди ҳәм пуқаралық жәмийетиниң басқа да институтларына бир қанша жеңилликлер жаратып бермекте.

Өткен 2018-жылдың өзинде Парламентлик комиссия тәрепинен жәрияланған 8 таңлаўда республикамыздағы  мәмлекетлик емес коммерциялық емес шөлкемлер ҳәм пуқаралық жәмийетиниң басқа да институтларының 24 жойбары жеңимпаз де табылып, оларға 674,1 миллион сум қаржы ажыратылды. Елимизде пуқаралық жәмийетин қәлиплестириў ҳәм оны раўажландырыўда, халықтың сиясий  мәдениятын және ҳуқықый санасын арттырыўда, мәмлекетлик уйымлар менен социаллық шериклик қатнасықларын беккемлеўде, жәмийетимиздиң барлық тараўларында әмелге асырылып атырған кең көлемли реформаларға белсене қатнасып киятырғанларды хошаметлеў мақсетинде Өзбекстан Республикасы Президентиниң 2018-жыл 14-ноябрьдеги қарары менен «Пуқаралық жәмийетин раўажландырыўға  қосқан үлеси ушын» көкирек нышаны шөлкемлестирилди.  Бизиң республикамыздан мәмлекетлик емес коммерциялық емес шөлкемлердиң 6 ўәкили усы көкирек нышанға ылайық деп табылды.

Илажда Өзбекстан Республикасы Олий Мажлиси жанындағы жәмийетлик қоры 2019-жылы  МКШ ҳәм пуқаралық жәмийетиниң басқа да институтлары арасында үлкен социаллық әҳмийетке ийе жойбарларды әмелге асырыўға мәмлекетлик социаллық буйыртпаларды усыныў ушын, сондай-ақ, «Ҳәрекетлер стратегиясы, «Жедел инвестициялар ҳәм социаллық раўажланыў жылы» Мәмлекетлик бағдарламасын орынлаўда МКШлардың белсендилигин қоллап-қуўатлаў» темасындағы Мәмлекетлик грант-таңлаўларына республикамыздағы  мәмлекетлик емес коммерциялық емес шөлкемлерди ҳәм пуқаралық жәмийетиниң басқа да институтлары белсене қатнасыўын тәмийинлеў бойынша ўазыйпалар белгиленди.


Д.АБИБУЛЛАЕВ,

Қарақалпақстан хабар агентлигиниң шолыўшысы.

Бөлимлер