Шавкат Мирзиёев: «Мен тек ғана өзбек халқының емес, бәлким қарақалпақ халқының да перзентимен!»

ӨЗБЕКИСТАН РЕСПУБЛИКАСЫ ПРЕЗИДЕНТЛИГИНЕ ТАЛАБАН ШАВКАТ МИРЗИЁЕВТЫҢ ҚАРАҚАЛПАҚСТАН РЕСПУБЛИКАСЫ САЙЛАЎШЫЛАРЫ МЕНЕН УШЫРАСЫЎДАҒЫ ШЫҒЫП СӨЙЛЕГЕН СӨЗИ (1-бөлим)

Ассалаўма әлейкум, қәдирли ўатанласлар!

Ҳүрметли дослар!

Мине усы бийпаян, сақый қарақалпақ диярында сиз, әзизлер менен ушырасып, бәршеңизди саў-саламат, жақсы кейпиятта көрип турғанымнан оғада қуўанышлыман.

Сөзимниң басында бәршеңизге, сизлер арқалы пүткил Қарақалпақстан хал­қына өзимниң терең ҳүрмет-иззетимди ҳәм жақсы тилеклеримди билдириўге рухсат еткейсиз.

Мине, ҳәзир ғана сизлер менен ҳәммемиз ушын әзиз ҳәм қәдирли болған Биринши Президентимиз ҳүрметли Ислам Әбдиғаниевич Кәримовты еслеп, ол инсанның өшпес естелигине ҳүрмет көрсеттик. Уллы Елбасшымыздың халқымыздың, Ўатанымыздың раўажланыўы жолындағы умытылмас тарийхый хызметлерин ҳәр биримиз ўақыт өткен сайын терең сезинбектемиз. Ҳәзирги ўақытта бул уллы инсан тийкар салған бийғәрез Өзбекистан мәмлекетин буннан былай да беккемлеў, елимизди дуньядағы раўажланған демократиялық мәмлекетлердиң қатарына алып шығыў, халқымыз ушын барлық тараўларда мүнәсип турмыс шараятын жаратып бериў бағдарындағы ўазыйпалар, сол жолдағы өзимиздиң парызымыз ҳәм жуўапкершилигимиз ҳаққында усы күнлерде ҳәммемиз ойлаўымыз, әлбетте, тәбийғый саналады.

Ислам аға елимиздиң барлық аймақ ҳәм регионлары қатарында Қарақалпақстанға, қарақалпақ халқына да айрықша бир ҳүрмет ҳәм мийрим-шәпәәт пенен қарайтуғын еди. Ол инсанның «Мен өзимди тек ғана өзбек халқының емес, бәлким қарақалпақ халқының да перзенти, деп билемен», деген, шын жүректен айтқан сөзлерин ҳәммемиз жақсы еслеймиз. Сондай-ақ, әзиз Елбасшымыздан өрнек алып, Ўатанымыздағы мыңлаған инсанлар бул шын жүректен шыққан сөзлерди өзиниң жүрек ҳәмири, турмыслық исеними деп есаплайтуғын еди.

Бүгин сиз, қәдирданларымның жанында, өзиниң тарийхында қаншадан-қанша машақатлы сынақларды көрген, мийнеткеш ҳәм кеңпейил Қарақалпақстан ўәкиллери алдында турып, қәлбимнен терең орын алған усы пикирди мен де үлкен ҳүрмет, үлкен мақтаныш пенен тәкирар­ламақ­шыман: «Мен тек ғана өзбек халқының емес, бәлким қарақалпақ халқының да перзентимен!».

Иншаалла, Алла таала маған қанша өмир берген болса, қай жерде болмайын, қайсы ўазыйпада ислемейин, мине усы сөзлериме бәрқулла садық болып қалыўға, қарақалпақ елине болған шексиз ҳүрмет-иззетимди әмелий ислер менен дәллилеўге ҳәрекет етемен, деп бәршеңизди исендиремен.

Әзиз дослар!

Мен ҳүрметли Ислам Әбдиғаниевичке жолдас болып, шерек әсирден аслам ўақыт ол уллы инсан менен бирге ислегенимнен шексиз мақтанышқа бөленемен. Ол инсан баслаған бәрше-бәрше ийгиликли ислерди алжаспастан, исенимли түрде даўам еттириўди өзимниң муқаддес парызым деп билемен. Усы жыл 4-декабрьде болып өтетуғын Өзбекистан Республикасы Президентин сайлаўда қатнасыў ушын мен мине усы идеяны өзимниң сайлаўалды бағдарламам ушын бас мақсет етип белгилеп алғанман.

Бәршемиз жақсы түсинип турмыз, бул сайлаў ҳәммемиз ушын оғада әҳмийетли, айтыў керек, шешиўши сия­сий процесс, алдымызда тур­ған тағы бир үлкен сиясий сынақ болып табылады.

Бул сайлаўлар арқалы бәринен бурын халқымыз өзиниң ертеңги күнин, мәмлекетимиздиң келешектеги раўажланыў жолын тағы бир мәрте анықлап, тас­тыйықлап алады. Мине, усы тийкарда сиясий дәрежесин, ҳуқықый мәдениятын, белсенди пуқаралық позициясын әмелде көрсетиў имканиятына ийе болады.

Бул сиясий илаждың тағы бир әҳмийетли тәрепи сонда, сайлаўды қалай өткериўимизге қарап, дүнья жәми­йетшилиги бизге баҳа береди, бул процесс арқалы елимизди және де жақсырақ таныйды. Бизиң имканиятларымызды жақыннан билип, халқымыздың демократиялық раўажланыўға, әдиллик ҳәм нызам үстинлигине, ашық-айдынлыққа, теңлик принциплерине садықлығын, дүнья халқы менен бирге ислесиў жолындағы умтылысларын көрип, ҳеш гүмансыз,  елимиз бенен өз-ара пайдалы байланысларды күшейтиўге болған қызығыўшылығы буннан былай да артады.
 

Усы мәниде, болажақ сайлаўларды Конституциямыз ҳәм миллий нызамшылық нормаларына, халықаралық стандартларға толық әмел еткен ҳалда өткериўимиз қандай үлкен әҳмийетке ийе екенин умытпаўымызды қәлер едим.

Кимде-ким сайлаў кампаниясын телевидение, интернет ҳәм ғалаба хабар қураллары арқалы бақлап атыр­ған болса, Президентлик лаўазымына талабанлардың орынларда сайлаўшылардың ўәкиллери менен ушырасыўлары видеоконференция тәризинде алып барылып атырғанын көриўи мүмкин. Халқымыздың сана-сезими  ҳәм ой-өриси, дүньяқарасы барған сайын кеңейип атыр­ған ҳәзирги күнде бундай ашық-айдын ҳәм жанлы сөйлесиў көпшилик ушын әйне тилегиндеги сөз екенин бул ушырасыўлар айқын көрсетпекте.

Болып өтип атырған сәўбетлерде адамлар, сайлаўшыларымыз тек ғана өзлери жасап атырған қала ҳәм аўылдың емес, ал, пүткил Өзбекистанның турмысы ҳәм келешеги менен байланыслы оғада әҳмийетли мәселелерди ортаға таслап атырғаны, олардың жуўапкершилик сезими менен жасап атырғаны бәршемизди қуўандырады.

Атап өтиў керек, сайлаў алдынан биз — бул үлкен лаўазымға талабанлар өз сайлаўалды бағдарламаларымызды сынақтан өткерип қоймастан, соның менен бирге, өзимиз де үлкен бир имтиханнан, сиясат ҳәм демократияның ҳақыйқый мектебинен өтпектемиз. Сия­сий-жәмийетлик турмысымыздың бәрқулла алдын­ғы қатарларында болып кия­тырған қарақалпақ халқы бул ҳақыйқатты әлбетте, жақсы түсинеди, деп исенемен.

Шавкат Мирзиёев: «Мен тек ғана өзбек халқының емес, бәлким қарақалпақ халқының да перзентимен!» >>>>

Шавкат Мирзиёев: "Гейде мен өзим, аграр ирригатор болмағанымда, бәлким шайыр боларма едим, деп ойлап қаламан">>>>

Шавкат Мирзиёев: "Қарақалпақстанда кейинги бес жылда 13 триллион 300 миллиард сумлық инвестиция өзлестирилди">>>>

Шавкат Мирзиёев: "Қарақалпақстанда соңғы бес жылда 6 мың 500 жаңа киши бизнес субъекти шөлкемлестирилды" >>>>

Шавкат Мирзиёев: "Қарақалпақстанда 120 жаңа кәрхана шөлкемлестириледи">>>>

Шавкат Мирзиёев: "Қарақалпақстанда улыўма нырқы дерлик 213 миллион доллар болған 8 инвестициялық жойбар әмелге асырылады" >>>>

Шавкат Мирзиёев: " 2017-жылы Нөкис қаласында 20 көп қабатлы турақ жай қурылады" >>>>

Шавкат Мирзиёев: "Қарақалпақстанда шетки аймақлардың халқы ушын 12 жаңа жөнелис шөлкемлестириледи" >>>>

Шавкат Мирзиёев: "Қарақалпақстанда келеси бес жылда 8 үлги жойбардағы балалар бақшасын қурылады">>>>

Шавкат Мирзиёев: "Қарақалпақстанда 16 кәрханада импорт орнын басатуғын дәри қуралларын ислеп шығарыў жолға қойылады"

 

Бөлимлер