Шавкат Мирзиёев: "Қарақалпақстанда кейинги бес жылда 13 триллион 300 миллиард сумлық инвестиция өзлестирилди"

ӨЗБЕКИСТАН РЕСПУБЛИКАСЫ ПРЕЗИДЕНТЛИГИНЕ ТАЛАБАН ШАВКАТ МИРЗИЁЕВТЫҢ ҚАРАҚАЛПАҚСТАН РЕСПУБЛИКАСЫ САЙЛАЎШЫЛАРЫ МЕНЕН УШЫРАСЫЎДАҒЫ ШЫҒЫП СӨЙЛЕГЕН СӨЗИ (3-бөлим)

Нөкис қаласындағы Игорь Савицкий атындағы Қарақалпақ мәмлекетлик көркем өнер музейи өзиниң бийбаҳа сүўретлеў өнери шығармалары менен тек ғана елимизде емес, ал, пүткил дүньяда да үлкен абырайға ерискен. Бул жерде 90 мыңға шамалас бийбаҳа экс­понатлар жәмленген болып, олардың арасында өзбек ҳәм орыс художниклериниң дөретпелери, қарақалпақ халық әмелий көркем өнери үлгилери, әййемги Хорезм мәмлекетине тийисли естеликлерди көриў мүмкин. 2003-жылы Биринши Президентимиздиң басламасы менен бул музей ушын жаңа, заманагөй имарат қурылғанынан сизлер жақсы хабардарсыз, әлбетте. Биз жақын ўақыт ишинде әне усы қурылыстың екинши басқышын, оны бүгинги күнниң талаплары тийкарында үскенелеў ҳәм жаңа экспозициясын жаратыў жумысларын әлбетте жуўмағына жеткеремиз.

Елимиздиң илим-пәниниң раўажланыўына мүнәсип үлес қосқан мар­ҳум академиклер Марат Нурмуҳаммедов, Сабыр Камалов, Чаржаў Әбдиров, Абат Дәўлетов, Әмин Бахиев, Турсынбай Ещановлардың өмирин ҳәм мийнет жолын жәмийетшилигимиз бәрқулла ҳүрмет пенен еслейди. Бүгинги күнде әне усы тараўда Ҳусниддин Ҳамидов, Жуманазар Базарбаев сыяқлы академиклеримиз, белгили медицина профессоры Абдулла Қудайбергенов, Ташкент мәмлекетлик юридика университетиниң ректоры, юридика илимлериниң докторы Есемурат Қаньязов сыяқлы  илимпазларымыз жемисли мийнет етип келмекте.

Өзиниң пидәкерлик мийнети менен «Өзбекистан Қаҳарманы» деген жоқары атаққа миясар болған тәжирийбели шыпакер Онесия Саитова, мийнеткеш фермер Сәрсенбай Сейтназаров ҳәм археолог илимпаз Ғайратдин Хожаниязовтың исмлерин ел-журтымыз жақсы биледи.

Солардың қатарында «Нураный» қорының Қарақалпақстан Республикасы бөлиминиң баслығы Шарап Уснатдинов, сондай-ақ, Жаңабай Шылманов, Жәлел Муятдинов, Қайыпберген Юсупов сыяқлы ҳүрметли нураныйлар ҳәм мәҳәлле жанкүйерлери өзлериниң үлгили ислери менен бәршеге өрнек болып келмекте.

Қәдирли дослар!

Қарақалпақстан Республикасы елимиздиң социаллық-экономикалық раўажланыўында қандай үлкен орын ийелейтуғынын бәршемиз жақсы билемиз ҳәм буны жоқары баҳалаймыз.

Бул туўралы сөз етиўден алдын әҳмийетли бир мәселеге итибарыңызды қаратыўды қәлер едим.

2010-жылы Бирлескен Миллетлер Шөлкеминиң бурынғы Бас хаткери мырза Пан Ги Мун Өзбекистанға келгенинде, мен ҳүрметли Елбасшымыздың тапсырмасы менен жоқары мәртебели мийманның Қарақалпақстанға сапары даўамында оған жолдас болдым. Биз вертолётта пәрўаз етип, пүткил Қарақалпақстан аймағын, қурып баратырған Арал теңизин жоқарыдан турып анық бақлаў имканиятына ийе болдық.

Сонда мен мийманымыз­ға Арал теңизи менен байланыслы экологиялық апатшылық ҳаққында, соның ишинде, теңиз ултанынан ҳәр жылы  700-800 миллион тонна дузлы самаллардың ҳаўаға көтерилетуғыны ҳаққында айтып берген едим.

Бундай аянышлы көринисти өзиниң көзи менен көрип, исениңлер, мырза Бас хаткердиң көзинен  жас шығып кетти. «Мен дүньядағы апатшылық болған жүдә көп жерлерди өз көзим менен барып көргенмен, - деди ол сонда. — Лекин бундай аўыр экологиялық жағдайды өмиримде биринши мәрте көрип турман. Сондай кескин жағдайға қарамастан, бул жерде жасап, мийнет етип атыр­ған адамларға, олардың сабыр-тақатына қайыл қалдым», деп айтқанын мен жеке өзим еситкенмен. Бул гәплерди Пан Ги Мун кейин телевидение арқалы да айтқанынан сизлер хабардарсыз.

Ҳақыйқатында да, тәғдирдиң, өмирдиң ҳәр қандай аўыр сынақ ҳәм қыйыншылықларына қарамастан, өз журтына, өз жерине, ата-бабаларының қәбирине ҳәмийше садықлық көрсетип жасап атырған мәрт ҳәм жигерли қарақалпақ елиниң беккем ерк-ықрарына тән берип, бундай халық пенен қаншелли мақтансақта, арзыйды.

Әлбетте, Арал дәртин, Арал апатшылығын пүткил халқымыз өзиниң дәрти деп қабыл етти. Биринши Президентимиз бул регионда жүзеге келген экологиялық апатшылықтың ақыбетлерин жумсартыў, дүнья жәмийетшилигиниң итибарын бул машқалаға қаратыў, қарақалпақ халқын ҳәр тәреплеме қоллап-қуўатлаў бойынша қандай үлкен жумысларды әмелге асырғаны сизлерге жақсы белгили.

Бул халық өтмиште де, ҳәзирги күнде де барлық машақатларға шыдам берип, ҳеш қашан ертеңги күнге исенимин жойытпай киятыр­ғаны үлкен бир ибраттың көриниси саналады. Алла тааланың қүдиретин қараң, ол қарақалпақ елиниң әне усындай сабыр-тақатына жараса олардан өзиниң мәрҳаматын аяғаны жоқ. Арал теңизиниң суўы азайған болса да, бул бий­паян үлкениң баўырындағы басқа да байлықларды қарақалпақ халқына, пүткил Өзбекистан халқына мол-молақай етип бермекте. Буның дәлилин усы регионда табылып атырған ҳәм иске түсирилип атырған тәбийғый байлықлардың жаңадан-жаңа кәнлери ҳәм резервлери мысалында айқын көриўимиз мүмкин.

Егер Қарақалпақстанның картасына қарасаңыз, оның үлкен саҳралар — Қарақум ҳәм Қызылқумның арасында жайласқанын, әтирапындағы орынлар Барсакелмес, Қумбасқан, Қойқырылған, Қанлыкөл деген атлар менен аталғанын көремиз. Бул атамалар өтмиштеги аўыр апатшылықлардан дерек беретуғыны тәбийғый, әлбетте.

Бүгинги күнде өзимиз көрип турғанымыздай, бул жердеги өмир көринислери түп-тийкарынан өзгермекте. Яғный, барлық қала ҳәм ра­йонлар, аўыллар жаңаша шырай ашып атырғанын, заманагөй кәрханалар, билимлендириў, медицина, мәденият ҳәм спорт мәкемелери, коммуникация тармақларының қурылып атыр­ғанын көрип, көзимиз қуўанады.

Булардың барлығы бәринен бурын, ғәрезсизлигимиздиң шарапаты, пүткил елимиз қатарында Қарақалпақстанның экономикасы да жоқары пәтлер менен раўажланып атырғанының нәтийжеси болып табылады.

Усы жерде базы бир мысал ҳәм санларға итибарыңызды қаратпақшыман. Қарақалпақстанда 2010-жылдан берли жалпы аймақлық өнимниң көлеми 1,5 есеге көбейди, онда санааттың үлеси 31 проценттен артты.

Кейинги бес жылда 13 триллион  300 миллиард сумлық инвестиция өзлестирилген болса, соның 2 миллиард 400 миллион доллары шет ел инвестициялары екенлиги итибарға ылайық. Ғәрезсизлик жылларында Биринши Президентимиздиң басшылығында Қарақалпақстандағы бай минерал шийки зат дәреклерин жоқары заманагөй технологиялар тийкарында өзлестириў, соның есабынан аймақтың экономикасын раўажландырыў, халықты жумыс пенен тәмийинлеў,  усы тийкарда халықтың абаданлығын арт­тырыў бойынша оғада үлкен жумыслар әмелге асырылды. Мәселен, Орайлық Азияда бирден-бир болған Қоңырат сода заводының қурылыўы шөл қойнындағы ҳақыйқый әжайыбат болды, десек, алжаспаған боламыз. Бул кәрханаға соңғы бес жылда 110 миллион долларлық инвестиция киргизилип, кальцийлестирилген сода ислеп шығарыўдың қуўатлылығы  2 есеге арттырылды ҳәм жылына 200 мың тоннаға жеткерилди.

Және бир бийбаҳа ҳәм үлкен жойбар — нырқы 4 миллиард доллардан аслам болған Үстирт газ-химия комплекси бүгинги күнде санаатымыздың локомотивине айланды. Өткен жылдың декабрь айында иске түсирилген бул комплекс жылына 4 миллиард кубометр газди қайта ислеў тийкарында 400 мың тонна полиэтилен, 100 мың тонна полипропилен, 100 мың тоннадан аслам пиролиз суйықлығын ислеп шығарыў қуўатлылығына ийе. Бул жерде жақын дәўир ишинде метанды тазалаў усылы менен синтетикалық суйық жаныл­ғы ҳәм парафин ислеп шығарыўды жолға қойыў режелестирилмекте.

Шавкат Мирзиёев: «Мен тек ғана өзбек халқының емес, бәлким қарақалпақ халқының да перзентимен!» >>>>

Шавкат Мирзиёев: "Гейде мен өзим, аграр ирригатор болмағанымда, бәлким шайыр боларма едим, деп ойлап қаламан">>>>

Шавкат Мирзиёев: "Қарақалпақстанда кейинги бес жылда 13 триллион 300 миллиард сумлық инвестиция өзлестирилди">>>>

Шавкат Мирзиёев: "Қарақалпақстанда соңғы бес жылда 6 мың 500 жаңа киши бизнес субъекти шөлкемлестирилды" >>>>

Шавкат Мирзиёев: "Қарақалпақстанда 120 жаңа кәрхана шөлкемлестириледи">>>>

Шавкат Мирзиёев: "Қарақалпақстанда улыўма нырқы дерлик 213 миллион доллар болған 8 инвестициялық жойбар әмелге асырылады" >>>>

Шавкат Мирзиёев: " 2017-жылы Нөкис қаласында 20 көп қабатлы турақ жай қурылады" >>>>

Шавкат Мирзиёев: "Қарақалпақстанда шетки аймақлардың халқы ушын 12 жаңа жөнелис шөлкемлестириледи" >>>>

Шавкат Мирзиёев: "Қарақалпақстанда келеси бес жылда 8 үлги жойбардағы балалар бақшасын қурылады">>>>

Шавкат Мирзиёев: "Қарақалпақстанда 16 кәрханада импорт орнын басатуғын дәри қуралларын ислеп шығарыў жолға қойылады"
 

Бөлимлер