"Ҳәр бир жас өз бағдарын жетик билсе, маман қәнийге болып шығыўы ушын математикаға уқсаған мәжбүрий пәнлерге қандай зәрүрлик бар?

Жаӊа  өзгерис  ҳаққында жаслар пикири
Студент болыў!  Қандай жанға жағымлы сөз. Мыӊлаған  жаслардыӊ арзыў-әрманы  болған  жоқары оқыў орнына  тест имтиханларынан табыслы өтип, гранд тийкарында оқыўға қабылланыў  бул   әлбетте, жыллар даўамындағы  тынымсыз изленислер, алынған билимлер нәтийжеси . Бүгинги күнде болса, ҳәттеки  контракт тийкарында оқыўға кирседе қуўанып, билим  алып атырған жаслар да аз емес. Себеби, жоқары мағлыўмат алыў  заманымыз талабына айланып баратырғандай. Өткен 2018-жылдан баслап-ақ, жоқары оқыў  орынларына тест тапсырыў бойынша жаӊа ҳәм бәршеге қолайлы бир неше өзгерислер киритилгены бәршеге мәлим. Ал, 2020-2021-жылларда ше? Усы жыллардан баслап тест имтиханларын тапсырыўға айтарлықтай жаӊаланыўлар болажақ екенлиги көпшиликти ойландырып қойды. Себеби, бул жақсылап ойланыўды талап ететуғын өзгерис. “ Жоқары  оқыў орынларына тест сынаўлары арқалы қабыл қылыў  системасын  жетилистириў бойынша  қосымша шара-илажлар  ҳаққындағы  ҳүжжет  жойбары  ислеп шығылды. Ҳүжжетке  муўапық көп ғана өзгерислер,соныӊ ишинде  2020-2021-жылы  қабыллаўынан  баслап: тест  пәнлери  комплексин  еки бөлимге ажыратып, 1-бөлимге бәрше тест тапсырыўшылары ушын мәжбүрий 3 пән-ана тили, математика  ҳәм  Өзбекстан тарыйхы, 2-бөлимге  даўагерлик қылынып атырған  тәлим жөнелисине  сай  еки пәнди киритиў де бар. Әлбетте,көп пәнди жақсы билиў ҳеш кимге артықмашылық етпейди.Дурыс, ана тили ҳәм өз тарыйхымызды жақсы билиў шәрт. Лекин, математика ше? Бул пәнниӊ  ҳәмме бағдар ушын зәрүрлиги барма екен? Бирақ, бул  жерде  ўақыт  ҳәм пул машқаласы турыпты. Себеби,ҳәзир  кимди көрсеӊиз  неше жыллардан берли тест имтиханларына таярлыққа  қатнап атыр. Ҳәттеки, айрымлар мектеп дәўиринен берли. 3 пәннен   таярланыў  шаӊарақтыӊ жақсы ғана бюджетиниӊ  белгили быр бөлегин ийелейди. Ал, 5 пәннен таярланыў бул тәрепин өзиӊиз есаплап көре бериӊ. Дурыс, жасы үлкенлер айтыўы  мүмкин, бизлер таярлыққа бармаяқ оқыўға кирдик деп. Бирақ, бүгинги күнде  қанша  билимли  болғаныӊ менен  таярлыққа  қатнамасаӊ  оқыўға  кириў мүшкилдей. Ал, ўақыт мәселесине келсек,аз ғана пурсттыӊ ишинде  ҳәм өзи  таярланып атырған қәнийгелик бойынша , және  мәжбүрий 3 пәнненде  таярланыўға үлгериў  абитуриентлер ушын қыйыншылық туўдырмайма екен?Ҳәзир ҳәр ким өзинше пикирлеўге, пикирин еркин баян етиўге ҳақлы. Бул сораўларға жуўап табыў мақсетинде  жасларға  жүзлендим. 


     Пәнлер көп болсада балл жыйнаў имканияты көплеў болады. Өзиӊниӊ тапсыражақ жөнелисиӊе жақсы  таярланып үлгере алмай қалсаӊ,мәжбүрий пәнлерди  билсеӊ оқыўға  кириў имканияты  аз да болса болады- дейди Гоззал Исмаилова.


     Биз  бундай өзгерис  болады деп ҳеш ойлаған жоқ едик. Мәжбүрий  пәнлердиӊ қосылғаны  қәўетерге салмақта. Ҳәр бир  жас өз  бағдарын жетик  билсе, маман қәнийге болып шығыўы ушын математика уқсаған мәжбүрий пәнлерге қандай зәрүрлик  бар?-дейди Жақсыликова Назийра студентликке талабан. Сораўнамамыз даўамында Назийра билдирген пикирге көпшилик  жасларда қосылатуғынына гуўа болдық. Бул  тек ғана  келешегимиз ийелери болған  жасларымыздыӊ жеке пикири ғана еди . Жуўмақ шығарыў болса ҳәр бир инсанныӊ өзине байланыслы.

Өзбекстан Жаслар Аўқамы Қарақалпағыстан Республыкасы кеӊесы жанында дүзылген «Жас репортёрлар» клубы ағзасы Гүлбану Абатбаева.

 

Бөлимлер