Халықаралық бақлаўшылар менен ушырасыў болып өтты

Ғалаба хабар қураллары арқалы бурын хабар етилгениндей, Өзбекистан Республикасы ҳүкиметиниң рәсмий мирәт етилиўи тийкарында Европада Қәўипсизлик ҳәм Бирге Ислесиў Шөлкеминиң Демократиялық институтлар ҳәм инсан ҳуқықлары бойынша Бюросы усы жыл 4-декабрьде болып өтетуғын Өзбекистан Республикасы Президенти сайлаўын рәсмий түрде бақлаў жумысын  2-ноябрь күни баслаған еди.

Петер Тейлер басшылығындағы Халықаралық бақлаўшылық миссиясын Ташкент қаласында 15 ағзадан ибарат болған бақлаўшы эксперт ҳәм мәмлекетимиз бойлап еки топарға бөлинген 20 узақ мүддетли бақлаўшы экспертлер қурайды. Буннан тысқары, Демократиялық институтлар ҳәм инсан ҳуқықлары бойынша Бюросының сайлаў күни 250 қысқа мүддетли бақлаўшылары қатнасыўы күтилмекте. Бақлаўшы ҳәм экспертлер Европада Қәўипсизлик ҳәм Бирге Ислесиў Шөлкемине ағза болған 21 мәмлекеттиң ўәкиллери саналады.

Халықаралық бақлаўшылар сайлаў күни сайлаў участкаларының ашылыўын, даўыс бериў процесин, бюллетеньлерди санаў ҳәм нәтийжелерин шығарыў илажларын бақлап барады.

Усы жылдың 16-ноябрь күни Европада Қәўипсизлик ҳәм Бирге Ислесиў Шөлкеминиң Демократиялық институтлар ҳәм инсан ҳуқықлары бойынша Бюросының бақлаўшылық миссиясы ўәкиллери Всеволод Перевозчиков ҳәм Ханс Хартвиг Каботлар Өзбекистан Республикасы Президенти сайлаўын өткериўши 1-Қарақалпақстан округлик сайлаў комиссиясының ағзалары менен ушырасты.

Округлик сайлаў комис­сия­сының баслығы Улықбек Жалменов халықаралық бақлаўшыларға Өзбекистан Республикасы Президенти сайлаўына байланыслы нызамлар, нормативлик-ҳуқықый ҳүжжетлер, сондай-ақ, усы тийкарда округлик сайлаў комиссиясы тәрепинен сайлаўға таярлық көриў ҳәм оны өткериў бойынша әмелге асырылып атырған жумыслар ҳаққында мағлыўматлар берди.

Атап айтқанда, ҳәрекеттеги нызамшылық талаплары тийкарында округлик сайлаў комиссиясы тәрепинен 591 сайлаў участкасы дүзилгени, олардың талап дәрежесинде үскенеленгени, Өзбекистан Республикасы Президенти сайлаўына байланыслы әдебиятлар менен тәмийинленгени, сайлаўшы­ларға барлық қолайлы шараятлардың жаратылғаны, бүгинги күнде сайлаўалды үгит-нәсият жумыслары алып барылып атырғаны ҳәм сайлаў кампа­ния­сында ашық-айдынлық ҳәм жәриялылықтың тәмийинленип атырғаны ҳаққында айтып берди.

Ушырасыўда Европада Қәўипсизлик ҳәм Бирге Ислесиў Шөлкеми Демократиялық институтлар ҳәм инсан ҳуқықлары бойынша Бюросының бақлаўшылық миссиясы ўәкиллери өз жумысларын нәтийжели шөлкемлестириў бойынша округлик сайлаў комиссиясының ағзалары менен өз-ара пикир алмасты.

С.ЖАНИЕВ.

Бөлимлер