Абитуриентлер жоқары окыў орынларына Мәмлекетлик хызметлер орайлары арқалы ҳүжжет тапсырады

Өзбекстан Республикасы Президентиниң 2019-жыл 14-май күни “Жоқарғы оқыў орынларына тест сынаўлары арқалы қабыл етиў системасын жетилистириў бойынша қосымша ис-илажлар ҳаққында”ғы ПҚ-4319-санлы қарары қабыл етилди.

Қарарға муўапық 2019/2020 окыў жылы қабыллаўынан баслап абитуриентлерге жоқары оқыў орынларының тест сынаўы тапсырылатуғын пәнлер жыйындысы бирдей болған үш бағдарға шекем бакалавр жөнелисинде таңлаўда қатнасыў ҳуқықын береди.

Сондай-ақ, 2019/2020 оқыў жылы қабыллаўынан баслап жоқарғы оқыў орынларына оқыўға қабыллаў бойынша кириў тест сынаўларын июль-август айларында өткериў белгилеп берилип;

тест сынаўлары шөлкемлестирилип атырған окыў жылынан алдынғы жылларда билимлендириў мекемелерин питкерген абитуриентлерден (майыплығы болған яки толық мәмлекет тәмийнатындағы шаслардан тысқары) тест сынаўларында қатнасыўы ушын ең кем ис-ҳақының ярым есеси муғдарында төлем өндириў;

абитуриенттиң тест сынаўында топлаған баллары ҳаққында мағлыўматты тест сынаўы өткерилген күнниң ертесине, оның оқыўға қабыл етилген яки етилмегенлиги бойынша белгиленген тәртипте тастыйықланған таңлаў нәтийжесин тест сынаўларын өткериў процесси жуўмақланғаннан кейин бир ҳәпте мүддет ишинде Мәмлекетлик тест орайының рәсмий веб-сайтында жәриялаў белгиленди.

Соның менен бирге, Өзбекстан Республикасы Министрлер Кабинетиниң
2019-жыл 7-июнь күнги “Жоқары оқыў орынларына оқыўға кириў ушын ҳужжетлерди қабыл етиў бойынша мәмлекетлик хызметлерин көрсетиўдиң ҳәкимшилик регламентин тастыйықлаў ҳаққында”ғы 468-санлы қарарына муўапық, абитуриентлер өзлериниң турақлы (ўақтыншалық) дизимге алынған жерине қарамастан, қәлеген Мәмлекетлик хызметлер орайына хызметтен пайдаланыў ушын мүрәжаат етиўи мүмкин.

Усы тастыйықланған ҳәкимшилик регламентине тийкар мәмлекетлик хызметлер орайлары арқалы 5 жоқары оқыӯ орнына яғный ГулМУ, ТМЮУ, СамМУ, ФерМУ ҳәм Қарақалпақ Мәмлекетлик университетлерине ҳүжжетлер қабылланыӯы белгилеп берилген болып, ҳәзирги күнде Шымбай районы Мәмлекетлик хызметлер орайы арқалы абитуриентлер жоқары оқыӯ орынларына ҳүжжетлери қабылланбақта.

Абитуриентлерге мәмлекетлик хызметлер ҳәр жылы 15-июньнан 15-июльға шекем көрсетиледи.

Буның ушын абитуриентлерден төмендеги ҳужжетлердиң түп нусқалары талап етиледи:

- пуқаралық паспорты (Ишки ислер бөлимлери тәрепинен берилген
09-форма бойынша физикалық шахстың идентификация номери, паспорт сериясы ҳәм номери көрсетилген мағлыўматнама);

- паспорт жасына жетпегенлер ушын туўылғанлық ҳаққындағы гүўалық;

- улыўма орта билимлендириў (11-класс тийкарында) яки орта арнаўлы, кәсип-өнер билимлендириў орынларын питкергенлиги ҳаққында ҳүжжет (қосымшасы менен бирге);

- Өзбекстан Республикасы Президентиниң ҳәмде Министрлер Кабинетиниң норматив-ҳуқықый ҳүжжетлеринде белгиленген тәртипте жеңилликке ийе болған абитуриентлер жеңиллик ҳуқықын тастыйықлаўшы ҳүжжет;

Абитуриентлер бир ўақыттың өзинде, оқытыўдың бир формасы шеңберинде үшеўге шекем жоқары оқыў орынларын таңлаў мүмкин. Бир нешше жоқары оқыў орынларын танлаўда имтихан тапсырылатуғын пәнлер жыйындысы ҳәм избе-излиги сәйкес болыўы шәрт.

Ҳүрметли абитуриентлер! Шымбай районы, Ш.Рашидов көшеси 47-жайда жайласқан Шымбай районы Мәмлекетлик хызметлер орайына келип жоқары оқыӯ орынларына ҳүжжетлериңизди тапсырыӯға шақырамыз.

 

 

 

 

             Шымбай районы

Мәмлекетлик хызметлер орайы

                бас қәнигеси                                                                         Б.Бекниязов.

Бөлимлер