Президентликке талабан Наримон Умаров Шоманайда сайлаўшылар менен ушырасты

Өзбекистан «Адолат» социал-демократиялық партиясынан Өзбекистан Республикасы Президентлигине талабан Наримон Умаров 21-ноябрь күни Қарақалпақтан Республикасы сайлаўшылары менен ушырасты.

Шоманай районы ҳәкимиятының мәжилислер залында онлайн конференция сөйлесиў тәризинде болып өткен ушырасыўда қала ҳәм районлардан кең жәмийетшилик ўәкиллери, пуқаралардың өзин-өзи басқарыў уйым­лары белсендилери, жергиликли Кеңеслердиң депутатлары, жаслар ҳәм ҳаял-қызлар, партия ағзаларынан ибарат жәми 3200 ге жақын сайлаўшы қатнасты.

Илажды Өзбекистан «Адолат» социал-демократиялық партиясының Қарақалпақстан Республикасы Кеңесиниң баслығы Е.Кунназаров алып барды. Өзбекистан Республикасы Президентлигине талабанның исенимли ўәкили, Өзбекистан «Адолат» СДП Қарақалпақстан Республикасы Кеңеси баслығының орынбасары Р.Отарбаев ушырасыў қатнасыўшыларын Н.Умаровтың өмирбаяны менен жақыннан таныстырды.

Президентликке талабан дәслеп қарақалпақ халқының аўызбиршилик пенен еткен мийнетлери нәтийжесинде бүгин Қарақалпақстан экономиканың ҳәр түрли салаларында өз орнына ийе регионлардан бирине айлан­ғанын атап өтти. Бул аймақта қурылған Қоңырат сода заводы және Үстирт газ-химия комплекси тек ғана регионымызда емес, ал, дүньядағы ең ири санаат кәрханаларынан бири сыпатында мәмлекетимиз экономикасының раўажланыўында әҳми­йетли орын ийелеп атырғаны, ең тийкар­ғысы, мине усындай дөретиўшилик ҳәм жаратыўшылық жумысларды қарақалпақстанлылар өз қоллары менен жаратып атырғаны ҳаққындағы пикирлерди ушырасыў қатнасыўшылары жыллы қабыл етти.

Н.Умаров ушырасыў қатнасыўшыларын өз сайлаўалды бағдарламасы менен таныстырар екен, демократиялық социаллық мәмлекет ҳәм әдалатлы пуқаралық жәмийетин қурыў, инновациялық экономикаға өтиў, күшли социаллық сиясат алып барыў, атап айтқанда, халықты сапалы медициналық хызмет, билимлендириў ҳәм турақ жай менен тәмийинлеў дәрежесин және де кеңейтиў, тынышлық сүйер сыртқы сиясатты даўам етиўге байланыслы усынысларын билдирди.

Әсиресе, Наримон Умаров өзиниң дерлик 40 жыллық мийнет жолы және илимий изленислерине байланыслы Арал теңизиниң қурыўы ақыбетинде аймақта жүзеге келген экологиялық апатшылықты сапластырыўға қаратылған жойбар ҳәм бағдарламаларда тиккелей қатнасқан, регионның қурамалы ықлымын, адамлардың жасаў шараятын жақсы ғын қәниге сыпатында экология мәселелерине айрықша итибар қарататуғынын мәлим етти. Оның аймақтағы экологиялық жағдайды жақсылаўға қаратылған жойбар ҳәм бағдарламаларды избе-из даўам еттириў зәрүрлиги ҳаққындағы усыныслары сайлаўшылар тәрепинен қоллап-қуўатланды.

Соның менен бирге, Президентликке талабан экологиялық жақтан таза технологиялар тийкарында жедел раўажланыўды тәмийинлеўге бағдарланған қолайлы экономикалық сиясат алып барыўды қоллап-қуўатлаў және санаат кәрханаларының шығындыларын қайта ислеў арқалы қоршаған орталықтың тазалығын тәмийинлеўге әҳмийетли ўазыйпа сыпатында қатнас жасайтуғынын атап өтти.

Буннан тысқары, талабан экологиялық маш­қалаларды шешиўде, оның экономикалық тәреплерине итибар қаратыў әҳмийетли екенине тоқтап, барлық экологиялық машқалаларды ҳәм оның менен байланыслы пуқаралардың саламатлығын қорғаў мәселелерин тек ғана Мәмлекетлик бюджетке жүклеў дурыс болмайтуғынын, сол себепли, қоршаған орталықты патасландырыўшы жәриймаға тартылыўы ҳәм көп муғдарда қаржы төлеўи лазым деген принципти енгизиў тәрепдары екенин атап өтти.

Наримон Умаров экология мәселелери социаллық-экономикалық сиясатымыздың баслы ўазыйпаларынан бири болып, бул саланы комплексли раўажландырыў бойынша өз алдына бағдарлама ислеп шығыўды ҳәм оны турмысқа енгизиўди режелестиргенин мәлим етти. Бағдарламада, атап айтқанда, тәбияттың санаат кәрханалары тәрепинен патасланыўын кемейтиў, шаң ҳәм зәҳәрли элементлерди көп жутатуғын өсимлик ҳәм тереклер санын ҳәм түрин көбейтиў, қалалар ҳәм санаат кәрханаларының әтирапында жасыл майданлар жаратыў, сексеўил ҳәм терекзарлықларды кеңейтиў арқалы қоршаған орталықтың тазалығын тәмийинлеўге қаратылған анық механизмлер белгиленетуғынын атап өтти.

Ушырасыўда Қарақалпақстан Республикасы Халық билимлендириў министрлигине қараслы 10-санлы көзи әззи балалар ушын қәнигелестирилген мәмлекетлик мектеп-интернатының директоры Н.Қайпбергенов,  Қарақалпақстан Республикаси Жоқарғы Кеңесиниң депутаты Н.Мырзамуратов, халық депутатлары Нөкис қалалық Кеңесиниң депутаты У.Сейтжанова, Шоманай районы «Ақжап» аўыл пуқаралар жыйынының баслығы Қ.Убайдуллаев ҳәм басқалар Президентликке талабанның бағдарламасын қоллап-қуўатлап шығып сөйледи ҳәм қатнасыўшыларды болажақ сайлаўда Наримон Умаровқа даўыс бериўге шақырды.

Ушырасыўда сөзге шыққанлар талабанның сайлаўалды бағдарламасы бойынша өз пикир ҳәм усынысларын билдирди. Өз нәўбетинде, Наримон Умаров ушырасыў қатнасыўшыларының көплеген сораўларына жуўап берди.

Р.АРЗИЕВ

KRuz.uz'нинг Facebook’даги расмий саҳифаси ва Telegram’даги каналига аъзо бўлиб, сўнгги янгиликлардан хабардор бўлинг

Бөлимлер