Тараўдағы реформалардың нәтийжелилигин арттырыў бағдарында

Соңғы жылларда мәмлекетимизде барлық тараўларда басқышпа-басқыш кең көлемли реформалардың әмелге асырылып атырғанына халқымыз өзлериниң күнделикти турмысында гүўа болмақта. Халық хожалығының бәрше тараўларын жеделлик пенен раўажландырыў мақсетинде бир қатар жеңилликлер берилип, айырым хызмет түрлерин еле де жетилистириў мақсетинде рухсат бериўши ҳәм лицензиялаўшы уйымлардың бир қанша ўәкиликлери қысқартылмақта. Өз нәўбетинде усы реформалардың нәтийжели орынланыўын тәмийинлеў Ҳүкиметимиз тәрепинен бир қатар қарарлар менен ҳуқықый-норматив қабыл етилип, әмелиятқа енгизилмекте.

Атап айтқанда, кейинги ўақытларда коммуналлық тараўлардағы реформалардың нәтийжелилигин тәмийинлеў, бул бағдарда юридикалық ҳәм физикалық шахсларға және де қолайлылықлар жаратып бериў мақсетинде Өзбекстан Республикасы Министрлер Кабинети тәрепинен қабыл етилген арнаўлы қарар тийкарында Электр энергиясын есапқа алыў үскенесин (есаплағышты) тармақтан ажыратыў, салыстырыўдан өткериў ҳәм орнатыў бойынша мәмлекетлик хызметлерин көрсетиўдиң Ҳәкимшилик Регламенти тастыйықланды.

Бул Регламентте юридикалық ҳәм физикалык шахслардың электр энергиясын есапқа алыў үскенелерин тармақтан ажыратыў, салыстырыўдан өткериў ҳәм орнатыў бойынша мәмлекетлик хызметлерин көрсетиў бағдарында Мәмлекетлик хызметлер орайлары менен биргеликте аймақлық электр тармақлары кәрханасы, «Ўзстандарт» агентлигиниң мәмлекетлик метрология хызмети органлары ҳәм Мәжбүрий орынлаў бюроларының аймақлық бөлимлериниң ўазыйпалары анық көрсетип өтилген.

Сондай-ақ, Регламенттиң юридикалық ҳәм физикалық шахсларға мәмлекетлик хызметлер көрсетиўди тәртипке салыў мақсетинде – мүрәжатлерди қәлиплестириў ҳәм жибериў, есапқа алыў үскенелерин тармақтан ажыратып алыў, салыстырыўдан өткериў ҳәм қайта орнатыў тәртиплери де белгилеп берилген.

Есапқа алыў үскенелерин салыстырыўдан өткериў жумыслары барысында – аймақлық электр тармақлары кәрханасы есапқа алыў үскенелерин тармақтан ажыратып алыў ҳәм қайта орнатыў, ажыратып алынған есапқа алыў үскенелерин «Ўзстандарт» агентлигиниң мәмлекетлик метрология хызмет органларына салыстырыўдан өткериў ушын усыныс етиў ислерин әмелге асыратуғын болса, Мәжбүрий орынлаў бюросының аймақлық бөлимлери бул бағдардағы жумыслардың барлық процесинде қатнасыў менен биргеликте есапқа алыў үскенелерине тамға (пломба) қойыў ислерин әмелге асырады.

Тутыныўшылар есапқа алыў үскенелерин салыўтырыўдан өткериў ушын мәмлекетлик хызметлерден пайдаланыўда Мәмлекетлик хызметлер орайларына өзлери келип мүрәжат етеди ямаса мәмлекетлик хызметлерден электрон тәризде пайдаланыў ушын Бирден-бир интерактив мәмлекетлик хызметлер порталы арқалы дизимнен өтеди ҳәм тийисли тәртиптеги сораўнаманы толтырады. Сораўнама толтырылғаннан кейин тутыныўшы ондағы мағлыўматлардың туўрылығын тексерип көрип, өзиниң электрон санлы имзасы менен тастыйықлайды ҳәм белгиленген тәртиптеги бир мәртелик төлемди әмелге асырады. Бул басқышта тутыныўшыдан басқа ҳеш қандай ҳүжжет талап етилмейди.

Мәмлекетлик хызметлерди көрсетиў ушын жыйым төленгенлигин тастыйықлаў мәлимлемекоммуникация системасы арқалы әмелге асырылады. Ал, есапқа алыў үскенелерин салыстырыўдан өткериў нәзерде тутылмаған жағдайларда тармақтан ажыратыў ҳәм қайта орнатыў ушын жыйым өндирилмейди.

Жаңа Регламент тийкарында есапқа алыў үскенелерин салыстырыўдан өткериў аралығы – физикалық шахслар ушын – 8 жыл, юридикалық шахслар ушын болса – 4 жыл етип белгиленди.

Бул жаңа Регламент тийкарында қабыл етилген тәртип, қағыйдалар менен жаратылып берилип атырған жеңилликлер биринши нәўбетте халыққа бүгинги дәўир талаплары тийкарында сапалы мәмлекетлик хызметлер көрсетиўден  ибарат болып табылады.

Әмиўдарья районы  мәмлекетлик хызметлер орайы қәнигеси Утепбергенова Гульчехра Кутлымуратовна

Бөлимлер