Кафелер қашаннан баслап күни-түни ислейди?

 

Ҳүкимет қарары менен усы жылдың 15-октябринен баслап улыўма аўқатланыў кәрханалары ҳәм кеўилашар объектлерде белгиленген талапларды сақлаған ҳалда олардың 24 саат даўамында күни-түни жумыс алып барыўына рухсат берилмекте.

Усы жылдың 24-июль күни Өзбекстан Республикасы Министрлер Кабинетиниң «Түнги ўақытта жумыс алып барыўшы улыўма аўқатланыў кәрханалары ҳәм кеўилашар объектлерде жәмийетлик қәўипсизликти тәмийинлеўге байланыслы қосымша ис-илажлар ҳақққында»ғы 624-санлы қарары қабыл етилди.

Қарар менен төмендеги талапларды орынлаған жағдайда улыўма аўқатланыў кәрханалары ҳәм кеўилашар объектлерине 24 саат даўамында күни-түни жумыс алып барыўына рухсат бериледи.

  Бунда елимиз бойлап енгизилип атырған “қәўипсиз қала” концепциясы шеңберинде, улыўма аўқатланыў кәрханалары ҳәм кеўилашар объектлердиң ишки бөлимине, соннан, хызмет көрсетиў ханалары, кириў ҳәм шығыў орынларына көринисти кеминде отыз күн даўамында сақлаў имканиятын бериўши видеобақлаў системасын орнатыў тийис.

    Сондай-ақ, имаратлардың әтирапы, автостоянка ҳәм оларға тийисли басқа аймақларды жетерли дәрежеде (кеминде 10 метр аралықта) жақтыландырыў талап етиледи.

    Имаратта шаўқымның рухсат етилетуғын шаўқым өлшемлерине койылатуғын санитариялық нызам талапларына әмел етиў ҳәм шаўқымның белгиленген нормаларынан аспаўын тәмийинлеў жүклетилген. Атап айтқанда, обеъктлерди толық даўыс өткермейтуғын етип үскенелеў яки түнги ўақытта музыка ҳәм даўыс күшейтиўши әсбап-үскенелерден пайдаланбаў талабы көрсетилген.

    Өрт өшириў қураллары ҳәм де биринши медициналық жәрдем көрсетиў ушын зәрүр болған дәри -дәрмақлар ҳәм медициналық буйымлар топламы салынған тез жәрдем қутышалары менен тәмийинлеўи керек.

    Соның менен бирге, имараттың ҳәмме ушын көринетуғын жерлеринде өрт ҳәм басқа айырықша жағдайлар жүз бергенде ҳәрекетлениў ҳәм пуқараларды эвакуация етиў сызылмасы ҳәм де тезлик пенен қутқарыў хызметлериниң телефон номерлери көрсетилген мағлыўматлар орнатылған болыўы зәрүр.

 Улыўма аўқатланыў кәрханалары ҳәм кеўилашар объектлер баслығы тәрепинен усы белгиленген талаплар орынланғанлығы ҳаққында аймақлық ишки ислер органларына тийисли мағлыўмат усынылады. Егер, бул белгиленген талапларға әмел етпеген ҳалда жумысын даўам еткен улыўма аўқатланыў кәрханалары ҳәм кеўилашар объектлериниң түнги ўақытта жумыс алып барыўы қадаған етиледи ҳәм де нызам ҳүжжетлеринде белгиленген тәртипте жуўапкершиликке тартылады.

    Жоқарыда белгиленген талапларға әмел еткен ҳалда түнги ўақытта жумыс алып барыўшы улыўма аўқатланыў кәрханалары ҳәм кеўилашар объектлердиң искерлигине ҳуқық қорғаўшы органларының  араласыўы қадаған етиледи.

    Видеобақлаў системасын орнатыў ҳәм жоқарыда белгиленген талапларды әмелге асырыў улыўма аўқатланыў кәрханалары ҳәм кеўилашар объектлериниң  өз қаржылары есабынан әмелге асырылады.

    Егер де түнги ўақытта жумыс ислеп атырған улыўма аўқатланыў кәрханалары ҳәм кеўилашар объектлер тәрепинен атап өтилген талаплар бузылса яки олардың түнги жумысы бойынша жәмийетшилик тәрепинен турақлы рәўиште наразылықлар билдирилсе, олардың түнги ўақытта жумыс алып барыў ҳуқықы жергиликли атқарыў ҳәкимият органлары тәрепинен бийкар етилиўи мүмкин.

 

Бахрам Сейтназаров

Нөкис қаласы әдиллик бөлими

аға мәсләҳәтшиси

Бөлимлер