Қарақалпақстан Республикасы И.В.Савицкий атындағы мәмлекетлик көркем музейинде пресс-конференция шөлкемлестирилди

2019 жыл 8 октябрь күни Қарақалпақстан Республикасы И.В.Савицкий атындағы мәмлекетлик көркем музейинде баспа-сөз ҳәм ғалаба хабар қураллары хызметкерлери  менен биргеликте пресс-конференция шөлкемлестирилди.

Бүгинги пресс-конференциямызға музейдиң соңғы жылларда әмелге асырып атырған ислери ҳәм жетискенликлерин кең жәмийетшиликке кеңнен ен жайғызыў мақсетинде баспа-сөз, ғалаба хабар қураллары ўәкиллерин ҳәм жергиликли блогерлерди мирәт еткенбиз.  

Өзбекстан Республикасы Ғәрезсизлик жылларында жетискен табыслар, нәтийжелер  ҳәм енгизилген жаңаша реформалар, сондай-ақ, мәмлекетимиз тәрепинен мәденият ҳәм көркем-өнер тараўын раўажландырыўда, жетилистириўде қабыл етилген бир неше  Пәрман ҳәм Қарарлардың орынланыўы ҳәм олардың музей саласында тутқан орны ҳәм әҳмийети оғада үлкен.

            Дүнья жүзлик баспа-сөз ҳәм қәнийгелердиң баҳалаўы бойынша Қарақалпақстан Республикасы И.В.Савицкий атындағы мәмлекетлик көркем-өнер музейиниң коллекциясы Орта Азиядағы ең жақсы көркем өнер топламлардың бири есапланады, ҳәзирде музей дүнья жүзине "Саҳрадағы Лувр" аты менен белгили.

            Музей өзиниң 100 мыңға жақын бийбаҳа экспонатлары менен дүнья жүзиндеги  мәденият, көркем-өнер тараўларына ықласбентлерин өзине тартқан Орта Азиядағы халық аралық әҳмийетке ийе музейлердиң бири болып есапланады.

Соңғы жылларда Қарақалпақстан Республикасы И.В.Савицкий атындағы мәмлекетлик көркем-өнер музейинде көпғана унамлы өзгерислер орын алмақта:

Хәр жылы Өзбекстан Республикаси мәденият министрлиги тәрепинен өткерилип атырған танлаўларда 2016 жылдан берли «Жылдың ең жақсы музейи», «Жылдың ең жақсы көргирзбеси»,  «Жылдың ең жақсы экскурсоводы», «Жылдың ең жақсы музей жанкүйери» номинацияларының жеңимпазы болып келмекте.

 Кейинги 2017, 2018, 2019 жыллары музей ҳаққында жәми 6 дана «Сокровища Нукуса» 2017 жыл, «Саҳрадағы Лувр» 2017 жыл, «И.В.Савицкий атындағы Қарақалпақстан мәмлекетлик көркем-өнер музейи» 2017 жыл, «Әсирлер аса мәңги илҳам» 2018 жыл, «Қарақалпақстан Республикасы И.В.Савицкий атындағы мәмлекетлик көркем-өнер музейи» 2018 жыл, «Қарақалпақ нағыслаў өнери» 2019 жыл атамаларында китап ҳәм каталоглар баспадан шығарылды.

2019 жылдың 9 айы даўамында музейге 81 мәмлекеттен 11774 шет елли туристлер келген болса, 9 ай даўамында қаржы түсими бойынша 2019 жыл жобасы 108% ке орынланды. Музей тәрепинен 13 музейде ҳәм 7 көшпели көргизбелер, орта арнаўлы ҳәм жоқары оқыў орынларында музей тәрийхы ҳәм топламына байланыслы 114 лекция өткерилип, музей илимий хызметкерлериниң 21 мақаласы республикамыз газета ҳәм журналларында баспадан шықты.

            Музейге келиўшилерге қолайлықлар жаратыў ҳам инновацион технологияларды енгизиў мақсетинде 2019 жыл 1 июлдан баслап музейде билетлер операциясының бирден-бир электрон системасын иске қосылды. Музейде билет операцияларының бирден-бир электрон системаға жалғанған билетлерди сатыў, есапқа алыў ҳәм тексериў ушын автоматик системаға ийе. Сондай-ақ музей экспонатлары менен өзбетинше танысыў ҳәм мағлыўмат алыў ушын аудиогидлер ҳәм фонограмма иске түсирилди. Аудиогидлер музейдиң бәрше бөлимлериндеги экспонатлар ҳаққында 5 тилде (өзбек, рус, инглиз, немец, француз  тиллеринде) ҳәм жақын арада қарақалпақ тилинде толық мағлыўмат береди. Дуньяның қәлеген жеринен интернет арқалы музейдиң 2 имәратындағы экспозиция залларын виртуал тамашалаў имкәнияты жаратылған. Инвалидлер музейди қолайлы шәраятта тамашалаўы ушын арнаўлы коляскалары ҳәм лифт иске қосылған.

            Бундай унамлы өзгерислер әлбетте «Саҳрадағы Лувр», «Нөкис ғәзийнеси» атамалары менен дүньяға белгили музейдиң атын еледе танытыўда  үлкен әхмийетке ийе болмақта.

            Қарақалпақстан  Республикасы И.В.Савицкий атындағы мәмлекетлик көркем музейинде болып атырған өзгерислер ҳәм жаңалықлар менен музейдиң рәсмий веб сайты, социал тармақлардағы рәсмий бетлери ҳәм телеграмм каналы арқалы танысып барың:

Веб сайт: http://museum.kr.uz/

Facebook: @savitskymuseum

Instagram: museumsavitsky1

Telegram: https://t.me/museumsavitsky

Бөлимлер