Пиротехника қуралларының нызамсыз саўдасына шек қойылды

Дүнья бойлап ҳәр жылы жаңа жый байрамы қарсаңы алдында пиротехника қуралларының нызамсыз айланысына байланыслы ҳалатлар ҳәм оның унамсыз тәсирлери көбирек көзге тасланады.

Республикамызда бундай жағдайдардың алдын алыў бойынша анық ҳуқуқый механизмлер енгизилген.

Қарақалпақстан Республикасы бажхына басқармасының  Контрабанда ҳәм бажхына нызамбузыўшылығына қарсы гүресиў бөлими хызметкерлери тәрепинен ҳуқуқ қорғаў уйымлары менен бирге Беруний районында оператив илаж өткерилди.

Илаж барысында пухара М.Х. тәрепинен 120 дана пиротехника қуралларын нызамға қайшы рәўиште өз басымшалық пенен сатып атырған ўақытта тоқтатып қалынды.

Соңынан усы пухараның жасаў үйи өз разылығы менен көзден кеширилгенде, оның ўйинде 420 дана пиротехника қураллары нызамсыз рәўиште сақланып атырғанлығы мәлим болды.

Сондай-ақ, Қоңырат районында бажыхана уйымлары тәрепинен өткерилген оператив илаж даўамында, пухара А.К тәрепинен тийисли ҳүжжетлери болмаған жәми 11 184 дана пиротехника қуралларын нызамсыз рәўиште сатып атырғанлығы анықланып, илаж қатнасыўшылары тәрепинен бул нызамсыз ҳәрекетке өз ўақтында шек қойылды.

Ҳәзирги ўақытта усы ҳалатлар бойынша бажыхана уйымлары тәрепинен сорастырыў жумыслары алып барылмақта.

 

Бөлимлер