Мәмлекетлик жоқары оқыў орынларының контракт суммасы да 7% ке көбейтиледи

«2020-жыл ушын Өзбекстан Республикасының мәмлекетлик бюджети ҳаққында»ғы Нызамның орынланыўын тәмийинлеў илажлары ҳаққында»ғы Президент қарары тийкарында 2020-жыл 1-февральдан баслап бюджет мәкемелери ҳәм шөлкемлери хызметкерлериниң мийнет ҳақы, пенсиялар, стипендиялар, напақалар және кем тәмийинленген шаңарақларға берилетуғын материаллық жәрдем муғдары 1,07 есеге көбейтиледи.

Бирақ та, қарар тийкарында базалық есаплаў муғдары, яғный 223 000 сум өзгериссиз қалдырылды.

Көпшилик студентлер ҳәм олардың ата-аналары «Базалық есаплаў муғдары өзгериссиз қалдырылды. Солай болса да, мәмлекетлик жоқары оқыў орынларында контракт суммасы көбейе ме?» деген сораўға жуўап излемекте.

Хабарыңыз бар, өткен жылы «ең кем мийнет ҳақы» деген түсиник бар еди. Мәмлекетлик жоқары оқыў орынларының контракт суммалары да усы «ең кем мийнет ҳақы»ға байланыстырып қойылған еди. Яғный, ең кем мийнет ҳақы көбейсе, контракт суммасы да көбейетуғын еди.

Енди «ең кем мийнет ҳақы» түсиниги «мийнетке ҳақы төлеўдиң ең кем муғдары» ҳәм «базалық есаплаў муғдары» деген еки бөлимге ажыратылды.

Ҳуқықтаныўшы Х.Худайбердиевтиң жазыўынша, мәмлекетлик жоқары оқыў орынларындағы контракт суммасы «мийнетке ҳақы төлеўдиң ең кем муғдары»на бириктирилген, «базалық есаплаў муғдары»на емес.

Демек, 1-февральдан баслап республика аймағында мийнетке ҳақы төлеўдиң ең кем муғдары 7% ке көбейтилетуғын болғанлықтан, мәмлекетлик жоқары оқыў орынларының контракт суммасы да 7% ке көбейтиледи.

Бул оқыў жылының 2-ярым жыллығы ушын әмел етеди.

 

1-февральдан баслап мийнет ҳақы, пенсия ҳәм стипендиялар муғдары көбейе ме?

 

«2020-жыл ушын Өзбекстан Республикасының мәмлекетлик бюджети ҳаққында»ғы Нызамның орынланыўын тәмийинлеў илажлары ҳаққында»ғы Президент қарары қабыл етилди.

«Ҳуқуқий ахборот» каналының мәлим етиўинше, қарар тийкарында 2020-жыл 1-февральдан баслап бюджет мәкемелери ҳәм шөлкемлери хызметкерлериниң мийнет ҳақы, пенсиялар, стипендиялар, напақалар және кем тәмийинленген шаңарақларға берилетуғын материаллық жәрдем муғдары 1,07 есеге көбейтиледи.

 

2020-жыл 1-февральдан баслап республика аймағында:

– мийнетке ҳақы төлеўдиң ең кем муғдары – айына 679 330 сум;

– пенсияны есаплаўдың базалық муғдары – айына 238 610 сум;

– жасқа байланыслы ең кем пенсиялар – айына 466 680 сум;

– балалықтан майыплығы болғанларға берилетуғын напақа – айына 466 680 сум;

– зәрүр жумыс стажына ийе болмаған кексе жастағы ҳәм мийнетке жарамсыз пуқараларға берилетуғын напақа – айына 286 390 сум етип белгиленди.

 

Ислам Матеков,

Қарақалпақстан хабар агентлиги.

Бөлимлер