Елликқалада пуқараның нызамсыз рәўиште тийисли ҳүжжетлерсиз алкоголь өнимлерин сатып келингенлиги анықланды

Бүгин елимизде исбилерменлик субъектлериниң жумыс алып барыўлары ушын барлық имканиятлар, қолайлықлар, шараятлар жаратылған. Деген менен, жаратылған имканиятлардан мақсетке муўапық пайдаланып атырған инсаплы исбилерменлер менен бирге, өз жумысын нызамға қарсы рәўиште алып барып атырған “исбилерменлер”  де жоқ емес.

Елликқала районы мәмлекетлик салық инспекциясының «Салық тараўында ҳуқықбузарлықлар профилактикасы» секторы тәрепинен өткерилген қадағалаў илажлары даўамында райондағы Бостан қаласы Ғ.Ғулом көшесинде жасаўшы пуқара Г.С. тәрепинен Айбек көшесиндеги номерсиз жайда нызамсыз рәўиште тийисли ҳүжжетлерсиз алкоголь өнимлерин сатып келингенлиги анықланды. Пуқараға тийисли болған 3 түрдеги жәми бахасы 1 миллион 111 мың  сумлық алкоголь өнимлери ўақтыншалық дәлилий айғақ сыпатында рәсмийлестирилди.

Сондай-ақ, райондағы «Қырық қыз» аўыл пуқаралар жыйынында жасаўшы пуқара Р.Р. Бостан қаласы дийқан базарында нызамсыз рәўиште тийисли ҳүжжетлерсиз алкоголь өнимлерин сатып келгенлиги анықланды. Тараў қәнигелери тәрепинен нызамсыз жумыс алып барып атырған пукараның жәми баҳасы 1 миллион 100 мың сумлық алкоголь өнимлери тийисли тәртипте расмийлестирилди.

Соның менен бирге, Шымбай районында өткерилген қадағалаў илажлары даўамында «Көкши қала» мәҳәлле пуқаралар жыйынында жасаўшы пуқара З.П. ҳәм районның «Дослық» мәҳәлле пуқаралар жыйында жасаўшы пуқара О.Т. лар тәрепинен өз үйлеринде нызамға қайшы рәўиште алкоголь өнимлерин сатып келгенлиги аныкланды ҳәм тараў қәнигелери тәрепинен «исбилермен»ниң нызамсыз жумысы анықланып, тийисли тәртипте рәсмийлестирилди.

Анықланған бундай  нызам бузыўшылық ҳалатлары бойынша әмелдеги нызам ҳүжжетлерине муўапық тийисли тәртипте ҳәкимшилик  шаралар қолланылатуғынлығы белгилеп қойылды. 

Орынларда салық тараўы хызметкерлери тәрепинен исбилерменлик субъектлери арасында салық мәдениятын қәлиплестириў ҳәм “Салық хызмети-инсаплы исбилерменлердиң исенимли шериги” ураны тийкарында үгит-нәсият, түсиндириў жумыслары алып барылмақта.

Қарақалпақстан Республикасы мәмлекетлик салық басқармасы Мәлимлеме хызмети

 

Бөлимлер