Қанлыкөлде Мәмлекетлик хызметлер орайы жаңа имәраты пайдаланыўға тапсырылды

Өзбекстан Республикасы Президентиниң 2017-жыл 12-декабрьдеги «Халыққа Мәмлекетлик хызметлерди көрсетиўдиң миллий системасын түптен реформалаў ис-иләжлары ҳаққында»гы ПП-5278-санлы Пәрманына муўапық бүгинги күнде Президентимиз тәрепинен халыққа мәмлекетлик хызметлерди көрсетиў тараўындағы жаңадан енгизилип атырған Пәрманлары халыққа сезилерли дәрежеде өзиниң унамлы тәсирлерин көрсетип келмекте. Өзбекстан Республикасы Президентиниң 2018-жыл 8-майдағы район (қалала)лардағы Халық қабыллаўханалары жанындағы Мәмлекетлик хызметлер орайлары имәратларының Мәмлекетлик-жеке шериклик шәртлери тийкарында қурылысын шөлкемлестириў ҳаққындағы ПҚ-3701 санлы ҳәм Өзбекстан Республикасы Президентиниң 2019-жыл 15-февральдағы Мәмлекетлик хызметлерди көрсетиўдиң миллий системасын жәнеде комплекс раўажландырыў ис-иләжлары ҳаққындағы ПҚ-4193-санлы қарарына тийкар Республикамыздың барлық аймақларында жаңа заманагөй ҳәм ҳәр тәреплеме қолайлы архитектуралық көриниске ийе Мәмлекетлик хызметлер орайлары имәратлары пайдаланыўға тапсырылмақта.

Соның менен бирге, усы жылдың 14-январь күни Қанлыкөл районы Мәмлекетлик хызметлер орайы жаңа имәраты қурылып пайдаланыўға тапсырылды.

Имәраттың ашылыўына Қанлыкөл районы ҳәкими Толыбаев Даўлет Аяпбергенович, Мәмлекетлик хызметлерлер агентлиги Қарақалпақстан Республикасы басқармасы баслығы орынбасары Досанов Ерназар Мауленбергенович шығып сөйледи. Имәраттың ашылыў мәресимине Қанлыкөл районы аймагындағы мәкеме ҳәм кәрхана баслықлары, жасы үлкен нураныйлар ҳәм район аймағында жасаўшы пуқаралар қатнасты.

Орайда мәмлекетлик хызметлерден пайдаланыўға келген пуқараларға барлық қолайлықлар жаратылған. Тийкарынан, пуқараларға қолайлы күтиў залларында электрон нәўбетке жазылған ҳалда орайдағы имканиятлардан пайдаланыўлары мүмкин. Орайда жас балалы аналар ушын арналған аналар ҳәм балалар майданшалары ажыратылған. Пуқараларға мәмлекетлик хызметлерден пайдаланыў менен бирге өзлериниң қыйнап атырған мәселелери бойынша орай ишинде жайласқан Өзбекстан Республикасы Президентиниң Канлыкөл районындағы Халық қабыллаўханасы, Өзбекстан Республикасы Бас министриниң Канлыкөл районы Исбилерменлер мүрәжатларын көрип шығыў қабыллаўханаларына мүрәжәт етиўлери мүмкин. Сондай-ақ, пуқаралар Мәмлекетлик хызметлер орайы хызметлери менен бирге мәмлекетлик нотариал хызметлерден ҳәм әдиллик бөлиминиң жуўаплы хызметкерлеринен ҳуқуқый мәсләҳат алыўлары мүмкин.

Халыққа мәмлекетлик хызметлерди көрсетиў тараўында олардың сыпаты, жеделлиги, ашық-айдынлығы ҳәм пайдаланыў имканиятын түптен асырыў - «Халық мәмлекетлик уйымларына емес, мәмлекетлик уйымлар халық ушын хызмет көрсетиўи керек» деген идеяны сөзсиз әмелге асырыўға көмеклеседи.

Соның менен бирге, өткен 2019-жыл даўамында Канлыкөл районы Мәмлекетлик хызметлер орайы тәрепинен 22 400 ден аслам мәмлекетлик хызметлер көрсетилген болса, соннан 1035 (мың) асламы көшпели тәртипте көрсетилген, 131 юридикалық шахслар ҳәм 207 жеке тәртиптеги исбилерменлик субъектлери мәмлекетлик дизимнен өткерилди. Мәмлекетлик хызметлер санының артып барыўы, хызметлерди халыққа қолайлы, тез ҳәм сапалы көрсетилиўин тәмийнлеў ушын қурып питкерилген жаңа имәрат район ҳалқы ушын үлкен жаңалық болды.

Халқымыздың ҳәм Президентимиздиң Мәмлекетлик хызметлерди көрсетиў тараўындағы бизлерге деген исенимин ақлаған ҳалда бул көрсеткишлерди буннанда жоқары дәрежеге көтериўге ҳәмде бәрше қолайлықларға ийе жаңа имәратта пуқараларға тез ҳәм сапалы хызмет кѳрсетиўимизге исеним билдиремиз!!!

 

Мәмлекетлик хызметлер агентлиги

Қарақалпақстан Республикасы басқармасы

Бөлимлер