Пушкин атындағы халықаралық таңлаўда жерлесимиз жеңимпаз болды

Ҳәр жылы өткерилиўи дәстүрге айланып қалған орыс тилши муғаллимлериниң Пушкин атындағы халықаралық таңлаўында қарақалпақстанлы муғаллимлерде жеңимпаз болып келмекте. Өткен жылы таңлаўда Нөкисли Шынар Альжанов жеңимпаз болған болған быйылғы XVI мәртебе өткерилип атырған таңлаўда Дильфуза Асанова жеңимпаз болыўға еристи.

ТАҢЛАЎ ҲАҚҚЫНДА БИРЕР СӨЗ

Негизинде бул таңлаў «Российский газета» тәрепинен 2000-жылдан баслап шөлкемлестирилип келмекте. Онда 22 мәмлекеттиң орыс тили муғаллимлери қатнасады. Быйылғы жылы таңлаўға қатнасқан муғаллимлер арасынан 50 и лауреат болды. Жеңимпазлар таңлаўға «Оқыўдағы дабыл. Бизиң мәмлекетимизде орыс тили муғаллим ким ҳәм қалай таярлайды?» атамасындағы эссеси менен қатнасты. Муғаллимлер өз эсселеринде бүгинги күни орыс тилинде оқытыўда айрым машқалалар менен бирге тили муғаллимлериниң жетиспей атырғаны ҳаққында сөз еткени мәлим болған.

Таңлаў жеңимпазлары Москва қаласы күни байрамы тамашаларында қатнасты ҳәм «Российский газета» ның редакциясында болып, ол жердеги жумыслар менен танысыўға миясар болды.

Таңлаў жеңимпазларын сыйлықлаў мәресими даўамында орыс тилин оқытыўдағы айрым машқалалар әтирапында пайда болған сораўларға қәнигелердиң пикири тыңланды. Мысал ушын А.С.Пушкин атындағы орыс тили атындағы институттың ректоры М.Русецкая бүгинги күни орыс тили муғаллимлери керек пе? деген сораўға былай деп жуўап берген еди. – Жоқары оқыў орны тәрепинен алып барылған изертлеў жумысларының нәтийжесине көре дүньяның 190 мәмлекетинде бир қатар тараўларға орыс тилин билетуғын 125 миллион қәниге кереклиги анықланған. Еки жыл алдын электрон тәризде оқытатуғын орыс тили мектеби ашылды. Онда 500 мыңдан адам аралықтан оқып атыр.

XVI халықаралық Пушкин атындағы таңлаўға 249 дөретиўшилик жумыс келип түскен солар арасынан 50 жумыс ең жақсы деп табылған.

http://kruz.uz/files/uploads/photos/b769ce03a8bcef8d620b4f7916b54e7e.jpg

 

НӨКИСЛИ ЖЕҢИЗПАЗ МУҒАЛЛИМ

Қарақалпақстанлы жеңимпаз қызымыз Дильфуза Асанова пайтахтымыздағы 13-санлы мектепте өз педагогикалық искерлигин алып бармақта. Журналист К.Пирназарованың орыс тилине болған қызығыўшылығы ҳаққындағы сораўға былай жуўап береди: Мен кишкене ўақытымнан баслап ақ орыс тилиндеги әдебий китапларды оқыўға қызықтым ҳәм оқып бардым. Бул қызығыўшылығымды ата-анамда қоллап-қуўатлап барды. Сол ушында мектепти тамамлағаннан соң Бердақ атындағы Қарақалпақ мәмлекетлик университетиниң орыс филологиясы қәнигелигине ҳүжжетлеримди тапсырдым. Жоқары оқыў орнында жақсы оқыдым. Өзимниң педагогикалық искерлигимди 13-санлы мектептен басладым, бүгинги күни усы мектепте 2-9-классларға орыс тили ҳәм әдебияты пәнин сабақ беремен. Ҳәр жылы Пушкин атындағы таңлаўға қатнасыў нийетинде болды, ал быйыл болса ортаға тасланған темаға қызығып эссени кеўилдегидей етип жаздым.

Асанова 2015-жылы орыс тили ҳәм әдебияты муғаллимлери арасында «Жыл муғаллими» таңлаўына қатнасып Нөкис қаласында биринши орынды алған болса, кейин ала Қарақалпақстан Республикасы бойынша да биринши болды.

- Ҳәр күни мектепке жақсы кейпиятта бараман, оқыўшылардың орыс тилин жақсы билиўин қәлеймен. Оларға орыс тилинде тез сөйлеп кетиў қыйын болса да көбирек өзлери үстинде жумыс ислеўге үйретип бараман дейди жеңимпаз муғаллим.

http://kruz.uz/files/uploads/photos/f92d949a038bdda78699b2fb6bbda3bf.jpg

Жеңимпаз муғаллимимиз үлкен тәжирийбеге ийе болмаса да ҳәр бир сабағына дөретиўшилик пенен қатнас жасаўға ҳәрекет етеди, өз оқыўшыларын орыс тилин қунт пенен үйрениўине тийкар жаратыўға ҳәрекет етеди.

Хурмет Атажанов,

Журналист

Бөлимлер