Олий Мажлис депутати Амударёда мактаблардаги бадиий адабиётлар сонини кенгайтириш ҳаракатида

Айни кунларда Олий Мажлис Қонунчилик палатаси депутатлари Қорақалпоғистон Республикасидан сайланган депутатлар аҳоли билан юзма-юз мулоқотларда иштирок этмоқда. 4-Амударё сайлов округидан сайланган Ўзбекистон Республикаси Олий Мажлиси Қонунчилик палатаси депутати Жолдасбай Абдижамилов Қўнғирот тумани «Адабиёт» ОФЙ ҳудудида сайловчилар билан очиқ мулоқот ўтказди.

Самимий мулоқотларда депутат юртимизда сўнгги пайтларда бўлаётган ижобий ўзгаришлар, янги қабул қилинаётган қонунларнинг мазмун-моҳияти тўғрисида аҳолига тушунтиришлар берди. Учрашувлар пайтида бир қатор муаммолар кўзга ташланди. Хусусан, «Адабиёт» ОФЙ ҳудудидаги Бўстонлиқ овули фуқароларидан ҳудуддаги коллекторнинг кўмилиб қолганлиги туфайли аҳолининг томорқалари зарар кўраётганлиги ва ушбу муаммони ҳал этиб бериш тўғрисида мурожаат келиб тушди. Депутат ушбу муаммони дарҳол ҳал этиш зарурлиги, коллектор тозаланса аҳоли томорқаларининг намлиги олди олиниши, натижада ҳудуддаги ернинг аҳволи яхшиланиши тўғрисида туман мелиорация бўлимига мурожаат қилди ҳамда муаммо ижобий ҳал этилди.

Шундан сўнг, депутат «Олмазор» МФЙ ҳудудидаги 32-сонли мактабга бориб, унинг моддий-техник базаси билан танишди. Мактаб кутубхонаси кўздан кечирилганда, умумий 4284 та дарсликлар, услубий қўлланмалар ва бадиий китоблар борлиги аниқланди. Лекин бадиий китоблар сони бироз камлиги кўзга ташланди. Шундан сўнг, мактаб ўқувчиларига бадиий китоблар жуда зарур эканлиги, чунки адабий китоблар уларнинг дунёқарашини кенгайтириб, маънавий дунёсини бойитиб боришда катта аҳамиятга эга эканлиги тўғрисида мактаб директорига тавсия қилинди ва мактаб маъмурияти бу масалани тезда ҳал этилишини маълум қилди.

Шунингдек, ушбу МФЙ ҳудуди аҳолиси билан учрашув ўтказилганда, 9 та фуқаро маиший техникага эҳтиёжи борлиги учун истъемол кредити олишда амалий ёрдам бериш тўғрисида мурожаат қилди. Шундан сўнг депутат ушбу масала юзасидан тумандаги Микрокредитбанк филиали билан алоқага чиққанидан сўнг, муаммо ўз ечимини топди.

Бўлимлар