Қарақалпақстан Республикасы Әдиллик министрлиги Салық инспекциясының қарарын бийкар етти

Нөкис қаласында жасаўшы пуқара А.У дың Нөкис қаласы мәмлекетлик салық инспекциясы тәрепинен қолланылған ҳәкимшилик жәриймадан наразы болды. Оған Нөкис қаласы мәмлекетлик салық инспекциясының буйрығына тийкар инспекция инспекторы тәрепинен қала аймағында пуқаралардың үй-жайға байланыслы мүлк ҳуқықын көшпес мүликке болған ҳуқықларын мәмлектлик дизимнен өткерилгенлигин анықлаў мақсетинде рейд тексериўи өткерилген. 

Өткерилген рейд даўамында, пуқараның өмирлик жолдасы өзине тийисли болған Нөкис қаласы, Ислам сүўретши көшеси, 14-үйиниң 22,63 пайызын Нөкис қаласы 6-санлы мәмлекетлик нотариал кеңсеси нотариусы тәрепинен тастыйықланған “Турақ жайды саўға етиў ҳаққында” ғы шәртнамаға  тийкар саўға етип алғанлығы ҳәм көшпес мүликке болған ҳуқықты мәмлекетлик дизимнен өткермегенлиги анықланған.

Анықланған ҳалат бойынша инспектор тәрепинен А.У ға ҳәкимшилик баянлама рәсмийлестирилип, сол күнниң өзинде 223 000 сум жәрийма салыў ҳақкында карар қабыл етилген. 

Бирақ, Нөкис қаласы 6-санлы мәмлекетлик нотариал кеңсеси нотариусы тәрепинен тастыйықланған  “Турақ жайды саўға етиў ҳаққында”ғы шәртнамаға тийкар саўға етилип атырған турақ жайдың бир бөлегине тийисли болған жер участкасына турақлы пайдаланыў ҳуқықы берилмегенлиги себепли, пуқара А.У усы жер участкасына болған ҳуқықты тастыйықлаў ушын Нөкис қаласы ҳакимлигине мүрәжат еткенлиги хәм қала ҳәкиминиң жер участкасына болған ҳуқықты тастыйықлаў ҳаққындағы қарары кешигип қабыл етилгенлигине ҳәмде бул жерде пуқараның айыпсыз екенлигине итибар қаратылмаған. 
Буннан тысқары, ҳәкимшилик ҳуқықбузарлық ҳақкындағы баянлама ҳәм жумысқа байланыслы материаллар алынған күннен  баслап он бес күнлик мүддет ишинде көрип шығылыўы керек болсада, А.У қарата ҳәкимшилик баянлама арадан 5 ай өткеннен соң көрип шығылған.

Жоқарыдығы халатлар бойынша пуқара А.У тәрепинен Қарақалпақстан Республикасы Әдиллик министрлигине мүрәжат еткеннен соң министрликтиң жуўаплы хызметкерлери тәрепинен үйренилди. 

Усыған тийкар, министрлик тәрепинен Нөкис қаласы мәмлекетлик салық инспекциясының пуқара А.У қарата 223 000 сум жәрийма салыўы ҳақкындағы Қарақалпақстан Республикасы мәмлекетлик салық басқармасына киритилген усынысқа тийкар,қала мәмлекетлик салық инспекциясының қарары бийкар етилди. 

Ғайрат Тлеумуратов 
Қарақалпақстан Республикасы Әдиллик министрлиги бөлим баслығы

Бөлимлер