“Таза қала” Акциясы даўамында 7900 соток (79 га) жақын майдан абаданластырылди

Қарақалпақстан Республикасы Министрлер Кеңеси, Өзбекстан жаслар аўқамы Қарақалпақстан Республикалық Кеңеси ҳәм Нөкис қаласы ҳәкимлиги басламасы менен 2020-жылдың 7-март күни “Жаңа Өзбекстанды, әлбетте, жаслар менен бирге қурамыз!” сүрени астында Нөкис қаласы бойлап “Таза қала” ғалабалық көклемзарластырыў акциясы өткерилди.

Акция мақсети Өзбекстан Республикасы Президенти Ш.М.Мирзиёевтың 2020-жыл 24-январь күни Өзбекстан Республикасы Олий Мажлисине жоллаған Мүрәжатында белгиленген ўазыйпалардың орынланыўын тәмийинлеў, Нөкис қаласын таза аймақ ҳәм жасыл белбеўли қалаға айландырыў, жаслар санасында экологиялық мәдениятты қәлиплестириў, елимизде әмелге асырылып атырған социаллық-сиясий өзгерислерде жаслардың жәмийетлик белсендилигин арттырыў есапланады.

Акцияны әмелге асырыў ушын биринши Жаслар аўқамының жетекшилери ҳәм белсендилери тәрепинен дүзилген исши топарлар тәрепинен Нөкис қаласындағы абаданластырыў талап етилетуғын 50 объект анықланып, Өзбекстан жаслар аўқамы Қарақалпақстан Республикалық Кеңеси тәрепинен ислеп шығылған www.ncity.uz сайтына жайластырылды. Итибарлысы бул абаданластырыў талап етилетуғын орынлар қызыл реңдеги нышанлар (байрақша) менен белгиленди.

2020-жыл 5-март күни Қарақалпақстан Республикасы Жоқарғы Кеңеси баслығының орынбасары А.Хамраев басшылығында министрлик, мәкеме, кәрхана ҳәм шөлкемлер басшыларынан ибарат исши топарының шөлкемлестириў мәжилиси өткерилип, тийисли министрлик, мәкеме, кәрхана ҳәм шөлкемлерге ўазыйпалар тапсырылды.

Жетискенликке ерискен ҳәм белсенди жәми 800 ден аслам жаслардан ибарат болған 40 “Кеўилли жаслар” үгит-нәсият отрядлары дүзилип, 5-6-март күнлери белгиленген объектлер жайласқан мәкан пуқаралары жыйынларында үгит-нәсият илажлары алып барды.

2020-жыл 7-март күни 3000 ға жақын кеўилли жаслардан ибарат 50 отряд тәрепинен тийисли объектлерде, министрлик, мәкеме, кәрхана ҳәм шөлкемлерде жумыс ислейтуғын жәми 2500 нан аслам жаслар тәрепинен “Дослық” каналы бойында, 5200ден аслам пуқаралар қатнасыўында мәкан пуқаралар жыйынлары аймағында ғалабалық көклемзарластырыў жумыслары алып барылды. Акцияға жәми 10700 ден аслам адамлар қамтып алынды.

Акцияға әскерий хызметкерлер ҳәм белсене қатнасты. Арқа-Батыс әскерий округи “Қоскөл” мәкан пуқаралар жыйыны аймағында, Миллий Гвардия Қарақалпақстан Республикасы басқармасы “Гөне қала” мәкан пуқаралар жыйыны аймағында абаданластырыў илажларын алып барды. (300 ден аслам әскерий хызметкерлер қатнасды)

Акция даўамында министрлик, мәкеме, кәрхана ҳәм шөлкемлер, кеўилли жаслар тәрепинен 7900 соток (79 га) жақын майдан абаданластырылып, 111,5 тонна шығындылардан тазаланды. Тазаланған орынларға 675 түп мүйўе, 18174 түп декоратив ҳәм 685 түп гүл нәллери егилди.

Сондай-ақ,

“Нураныйлар қәдирлеўимизде” жойбары шеңберинде 230 кеўилли жаслардан ибарат 9 патронаж жаслар отрядлар шөлкемлестирилди. Отряд ағзалары тәрепинен мәкан пуқаралар жыйынында жасаўшы жәми  65 урыс ҳәм мийнет ветеранлары, бағыўшысын жоғалтқан, имканияты шекленген, сондай-ақ, жалғыз баслы пуқаралардың ҳалынан хабар алынып, медициналық көригинен өткериў менен бирге олардың жасап атырған үй әтирапларында абаданластырыў жумыслары алып барылды.

“Эко патруль” жойбары шеңберинде 280 кеўилли жаслардан ибарат велопатруль топарлары тәрепинен халық көп жыйналатуғын жерлерде тасланған шығындылардан тазаланды.

Акция жуўамғында “Жаслар орайы” имараты алдына гала-концерт шөлкемлестирилип, күн даўамында акцияда белсене қатнасқан министрлик, мәкеме, кәрхана ҳәм шөлкемлер, мәкан пуқаралар жыйынлары, сондай-ақ, кеўилли жаслар “Ең белсенди шөлкем”, “Ең белсенди жас”, “Ең белсенди отряд”, “Ең белсенди блогер”, “Ең белсенди шөлкемлестириўши”, “Ең белсенди нураный” ҳәмде “Ең белсенди бирге ислесиўши шөлкем” номинациялар бойынша шөлкемлестириўшилер тәрепинен хошаметленди. Сыйлақлаў мәрсиминде Қарақалпақстан Республикасы Жоқарғы Кеңеси баслығының орынбасары А.Хамраев, Нөкис қаласы ҳәкими П.Торешов, Жаслар аўқамы Қарақалпақстан Республикалық Кеңеси баслығы А.Данияровлар қатнасды.

Гала концерт жуўмағында “Таза қала” акциясын даўам еттириў мақсетинде эстафета Нөкис қаласынан Хожели районына тапсырылды.

Бөлимлер