Жәмийетимиздиң жас жетик кадрлары «Камалак»тан камал тапты

Президентимиз айтқанындай: «Жаслар-келешек қурыўшысы». Ал, ертеңги келешегимиз болған жаслар бүгинниң балалары.  Ҳәр бир инсан кеўлиндеги үмит ушқынлары, келешекке қарай баслаўшы әрманлар, сондай-ақ, «Ким болсам екен?» сыяқлы ойлар балалық ўақытлардан баслап қәлиплесе баслайды.

2001-жыл 23-май. Бул сәнеде елимиздеги әне усындай қыяллар  қушағында енди ғана талант, қәбилет, доретиўшилик ийелерине айлана баслаған балаларды қоллап-қуўатлаў, оларға жақыннан жәрдем көрсетиў, туўры жолға бағдарлап бир мақсетте бирлестириўши «Камалак» балалар шөлкеми шөлкемлестирилген еди.

Мине, 19 жыл даўамында 14 жасқа шекемги балаларды өз қушағына алып, олардың гирбиңсиз кеўил ханаларын шадлыққа, бахытқа, дослыққа бөлеп киятырған шөлкем. Перзентлеримизди миллий идея тийкарында Ўатанға  садық ҳәм кәмил перзентлер етип тәрбиялаў, қәбилетлерин жүзеге шығарыў ҳәм раўажландырыў мақсетинде искерлик көрсетип келмекте.

Бүгинги жәмийетимиздиң жетик кадрлары да усы шөлкемнен камал тапты. 
Шөлкемниң белсенди ағзаларының жанып турған көзлерине қарар екенмен, олардың жаңа идеялар, жаңа басламалар мысалында бирлесиўи, мисли «Айқулақ» киби жарқырап, рәңбе-рең нур таратыўына мегзетемен.

«Камалак» балалар шөлкеми әтирапында бирлескен гүллән балаларымыз, перзентлеримиз ертеңги айдын келешек тымсаллары бола алыўын, олардың көзлеринен, сөзлеринен аңлаў қыйын емес. Олар бар екен, ертеңги келешегимизден үмитимиз күшли.

Бүгинги 19 жасың мүбәрек – «Камалак»!


А.Данияров.
Өзбекстан жаслар аўқамы
Қарақалпақстан Республикалық
Кеңеси баслығы, сенатор.

Бөлимлер