KRuz.uz'ға мүрәжат: Хожелиде қурылған үй-жайлардың жойбарлаў ислерин ислеген "Қишлоққурилишлойиҳа"ға не ушын елеге шекем төленетуғын төлемлер төленбей атыр?

KRuz.uz'ға "Қишлоққурилишлойиҳа" ЖШЖ Қарақалпақстан филиалынан мүрәжат. 

- 2017-жыл 25-январдағы Президентимиздиң Қарақалпақстан Республикасына болған сапары даўамында халықтың турмыс дәрежесин жақсылаў мақсетинде белгилеп берилген тапсырмалар ҳәм кең жыйналыс протоколына муўапық, Хожели қаласында 3 қабатлы,  20 ханаданлы, 1-қабаты халыққа хызмет көрсетиў дүканлары менен "Мустақыллық" көшесине үй-жай қурыў тапсырылды. 

Үй-жайды жойбарлаў ислери "Қишлоққурилишлойиҳа" ЖШЖ Қарақалпақстан филиалы тәрепинен ислеп шығылды. 

Ислеп шығылған жойбарлаў жумыслары буйыртпашыларға филиал тәрепинен өз ўақтында тапсырылды. 

Бирақ, буйыртпашылар тәрепинен бүгинги күнге шекем жойбарлаў жумыслары ушын төлемлер толық төленбей атырғанлығын билдиремиз, оларға бир неше мәрте хат пенен мүрәжат етиўимизге қарамастан нәтийже болмады. 

Буйыртпашылар тәрепинен жәми 333 млн 741 мың 348 сўм төлем төленбеди.

Бул хат Хожели ҳәкимине де 21-май күни жиберилген,бирақ, ҳәзирги күнге шекем ҳеш кандай жуўап келмеген. Буны калай түсинсек болады? 

Президентимиз үй-жайды жойбарлаў ислерин "Қишлоққурилишлойиҳа" ЖШЖ Қарақалпақстан филиалына тапсырың ҳәм пулын бермеңлер деп тапсырма бермеди, ҳүрметли буйыртпашылар.

Егерде толық ҳүжжетлер талап етилсе, биз көрсетиўге тайынбыз.

Жоқарыдағы жағдай бойынша жуўапкерлерден рәсмий жуўап күтип қаламыз!

P.S:  Жоқарыда жазылған мағлыўматлар тоқыма емес. Ҳеш бир жуўапкер шахс ямаса басшыға кегимиз жоқ.

Бөлимлер