Муса Ерниязов Covid-19 жуқтырғаны ҳаққындағы мыш-мышлар тийкарсыз

Makan.uz сайтының телеграмдағы бот мәнзилине усы жылдың 4-июль сәнесинде пуқара Қарақалпақстан Республикасы Жоқарғы Кеңеси баслығы Муса Тажетдинович Ерниязов Covid-19 вирусын жуқтырып алғаны ҳаққында мағлыўмат жоллады.

Makan.uz сайты бул мағлыўматтың қаншелли дәрежеде ҳақыйқат екенлигин анықластырыў ушын Қарақалпақстан Республикасы Жоқарғы Кеңеси баспасөз хаткери Байрам Айтмуратовқа телеграм арқалы хабарласты. Жоқарғы Кеңес баспасөз хаткери бизге, Муса Тажетдинович Covid-19 жуқтырғаны туўралы мыш-мышлар тийкарсыз екенин ҳәм М.Ерниязов бул вирус пенен кеселленбегенин мәлим етти. Сондай-ақ, Жоқарғы Кеңес баслығы кеше, 4-июль күни жумыста болғанын қосымша қылды.

Makan.uz’ға дереги бүгин, яғный, 5-июль күни азанда Муса Тажетдинович үйиниң алдындағы гүллерге қарап жүргенин көргенин хабарлады.

Қарақалпақстан Республикасы Жоқарғы Кеңесиниң баспасөз хаткери пуқаралардан ҳәзиргидей қыйын-қыстаўлы ўақытта тийкарсыз хабарларды тарқатпаўды сорады.

Лалагүл Қаллыханова,

журналист

Makan.uz

Бөлимлер