Нөкисте суўға ығып баратырған еки адамның бири қутқарып қалынды. Екиншиси қайтыс болды

Күни кеше, 6-июль күни саат 21:00 шамасында Нөкис қаласы "Жийдели байсын" МПЖ аймағынан ағып өтиўши каналды жүзип өтпекши болған Шоманай районы турғыны 1984- жыл туўылған пуқара У.Е ҳәм Нөкис қаласы турғыны 2012-жыл туўылған жас өспирим Т.Б суўға шөге баслаған. Ўақыя орнына жақын жерде болған Қарақалпақстан Республикасы Айрықша жағдайлар басқармасы бөлим баслығы подполковник Чимбергенов Радмир Кеунимжаевич ҳәм Нөкис қаласы, "Жийдели байсын" МПЖ, Абат аўыл көшеси, 6-жай турғыны Хабипов Мурат Дуйсенбаевич тезлик пенен жәрдемге асыққан. Нәтийжеде, 2012-жыл туўылған жас өспирим Т.Б өмири кәўиптен сақлап қалынды. Бахытқа карсы, 1984-жыл туўылған пуқара У.Е ни кутқарып қалыў иләжы болмады.
Дәслепки мағлыўматларға қарағанда, пуқара спиртли ишимлик тәсиринде болған. Подполковник Р.Чимбергенов ҳәм пуқара М.Хабипов дәрҳал жас өспирим Т.Б ға биринши медициналық жәрдем көрсеткен ҳәм тийисли орынларға хабар берген. Қарақалпақстан Республикасы Айрықша жағдайлар басқармасы арнаўлы  қутқарыў отряды ўакыя орнына жетип барып, пуқара У.Е ниң денесин суўдан алып шыққан.  Ҳүрметли пукаралар, қәўипсизлик қағыйдаларына әмел етпей, мәс ҳалда белгиленбеген жерлерде шомылыў кеўилсиз жағдайларға алып келиўи мүмкин. Қәўипсизлигиңизге итибарлы болың!!!

Қарақалпақстан Республикасы Айрықша жағдайлар басқармасы ГХК ҳәм ЖШМБИ топары баслығы аға лейтенант Айбек Абдирахманов

Бөлимлер