Хызмет лаўазымынан пайдаланып жынаят ислегенлер

Пуқара И.Тилеўов мәмлекетлик шөлкем болған «Саламатлық орайы»нда бас есапшы лаўазымында ислеп келип, усы орайдың директоры лаўазымында ислеген М.Алламбергенов пенен бирге рәсмий ҳүжжетлерге өтирик мағлыўматлар киргизип, жынайый тил бириктирип, өзлериниң нийетлерин әмелге асырыў мақсетинде жынаят жолына кирген. Атап айтқанда, Өзбекистан Республикасы Финанс министрлиги ҳәм Денсаўлықты сақлаў министрлигиниң арнаўлы қарарлары менен тастыйықланған штатлар кестесин қопал рәўиште бузып, шыпакер штаты белгиленген болыўына қарамастан орайға «фельдшер» алып, нызамсыз штат бирлигин шөлкемлестирип, 2015-жыл 9-февральдан баслап 2016-жыл 30-январьға шекем усы лаўазымда ислеп келген Ш.Туржановаға жәми 4.483.752 сум айлық ис ҳақыны бюджет пулларынан төлеп келген. Сондай-ақ, орайда ислеўши бир қатар хызметкерлерге 3.264.085 сум муғдарында хошаметлеў пулларын өзлестириў ҳәм растрата етиў жолы менен жәми 7.747.837 сум пулды талан-тараж еткен.

Пуқара И.Тилеўов жоқарыдағы жынаятлары менен турмай, бул исин еле де жалғастырып, орайда М.Алламбергенов ислемеген ўақытларда да тийкарсыз рәўиште 4.204.350 сум муғдарындағы пулларды өзлестирген. Сондай-ақ, 2015-жылы 24-март күнги төлеў тапсырмасына директордың қолын өзи қәлбекилестирип танысы С. Байжанованың кредит төлеми ушын 1.000.000 сум, 2014-жыл июнь айынан 2016-жыл февраль айына шекем өзиниң пластик картасына тийкарсыз рәўиште өткерип, жәми 5.204.350 сум пул қәрежетлерин өзлес-тирип, талан-тараж еткен.

Сондай-ақ, И.Тилеўов 2014-жыл май айынан баслап 2016-жыл февраль айына шекем мәмлекет бюджетинен «Саламатлық орайы»на қәрежетлер ушын ажыратылған 5.403.750 сум пул қәрежетлерин Нөкис қаласындағы «Поли-грапе»ЖШЖ, «Ризо-принт Нукус», «Баспа» жеке меншик кәрханаларына канцелярия өнимлери ушын өткерип, усы кәрханалардан канцелярия өнимлерин орай хызметкерлерине тарқатпастан өз жеке мәплери ушын сарплап, жәми 5.403.750 сум бюджет қәрежетлерин өзлестириў жолы менен талан-тараж еткен.
Солай етип, судланыўшылар И.Тилеўов ҳәм М.Алламбергеновлар суд мәжилисинде айыпларын толық мойынлап, ислеген қылмысларына бола тийисли жазаларын алды.
 
Обиджон ЮЛДОШОВ
Район прокуратурасы тергеўшиси лаўазымында ис үйрениўши
taxtatani.uz

Бөлимлер