Россияда COVID-19 вакцинасы сынақлары табыслы жуўмақланды. Емлеў октябрь айында басланыўы мүмкин

Россияда COVID-19 вакцинасы сынақлары табыслы жуўмақланды. Емлеў октябрь айында басланыўы мүмкин

 Россияда коронавирустан қорғайтуғын дәслепки вакцина үстиндеги клиникалық сынақлар жуўмақланды,  деп хабар берди мәмлекет денсаўлықты сақлаў министри Михаил Мурашко. Оның сөзлерине көре,  вакцина тез арада дизимге алынады ҳәм соннан кейин,  октябрь айынан баслап ғалабалық емлеў илажларын баслаў жобаластырылған.

 Вакцина Н. Ф. Гамалея атындағы Эпидемиология ҳәм микробиология миллий изертлеў орайы илимпазлары тәрепинен ислеп шығылған.

 «Гамалея институты тәрепинен ислеп шығылған коронавирустан қорғаўшы дәслепки вакцина бойынша клиникалық сынақлар жуўмақланды. Ҳәзирде дизимге алыў процеслери ушын ҳүжжетлер таярланып атыр. Және бир вакцина үстинде клиникалық изертлеўлер алып барылмақта,  келеси бир ярым - еки ай ишинде клиникалық изертлеўлер өткериў ушын рухсат берилиўин сорап тағы кеминде еки арза келип түсиўин күтип атырмыз», - деген Мурашконың сөзлерин келтирмекте РИА Новости.

 Министрдиң атап өтиўинше,  Россияда коронавирустан ғалабалық емлеў илажлары октябрь айынан басланыўы мүмкин,  бирақ биринши нәўбетте халықтың бөлек категориялары - шыпакерлер,  оқытыўшылар ҳәм үзликсиз түрде көплеген адамлар менен контактта болатуғын инсанлар қамтып алынады.

 Алдынырақ рәсмийлер вакцинация бийпул болыўын атап өткен еди.

 BBC'дың айтыўынша,  Россияның коронавирусқа қарсы вакцина табыў үстиндеги изертлеўлери табыслы болып атырғанына АҚШ ҳәм Европада гүман менен қаралып атыр. Рус вакцинасына скептик жантасыў тек ғана ҒХҚ,  бәлки денсаўлықты сақлаў тараўы экспертлери тәрепинен де билдирилмекте.

 Россиядағы клиникалық сынақлар коронавирустан вакцинаны ким биринши жаратыўы жолындағы басқа мәмлекетлер менен бәйги себепли қағыйдаларды бузған жағдайда өткерилген болыўы мүмкинлиги айтылмақта. Россия вакцина үстиндеги сынақлар бойынша илимий дәлиллерди ашықламаған,  сол себептен жоқарыдағы гүманларды тексериў мүмкиншилиги жоқ.

 Жума күни АҚШ Конгресиндеги еситиўлерде мәмлекеттиң бас инфекционисти Энтони Фаучи Россия ҳәм Қытайдағы вакциналар бойынша пикир билдиреди екен,  клиникалық сынақлар тез жуўмақланғанынан келип шығып,  олар барлық қағыйдаларға муўапық түрде өткерилгенине гүман билдирген еди.

 Қосымша ретинде,  Россия президенти Владимир Путин апрель айында коронавирус профилактикасына тийисли клиникалық ҳәм оған шекем болған сынақлар ҳәм мәмлекетлик дизиминен өткериўди әпиўайыластырыў ҳәм мүддетин кемейтиў бойынша тапсырма берген.

 Еслетип өтемиз,  усы вакцина Қорғаныў министрлиги менен биргеликте ислеп шығылған болып,  әскерий мәкеме июль айы басында-ақ вакцина Бурденко атындағы әскерий госпиталда,  кеўилли әскерлерде табыслы сынақтан өткенин жәриялаған еди.

Бөлимлер