Ҳүрлиман бақсы атындағы таңлаў жәрияланды

Қарақалпақстан Республикасы Мәденият ҳәм спорт ислери министрлиги тәрепинен усы жылдың март айының 15 сәнесинен баслап Бердақ атындағы Қарақалпақ мәмлекетлик музыкалы театрында қыз бақсы Ҳүрлиманның атын мәңгилестириў, оның дөретиўшилик жолын үйрениў, бақсышылық мектебин жаратып, халық арасынан талантлы бақсы қызларды табыў ҳәм кең жәмийетшиликке танысытырў, қыз бақсыларды еле де қоллап-қуўатлаў мақсетинде Ҳүрлиман аты менен таңлаў фестивалы өткериледи.
 

Таңлаўды өткериў тәртиби ҳәм шәртлери


Қала ҳәм районлық басқышлар – (февраль айында) – ҳәр бир районда жеңимпаз болған 3 бақсыға кейинги басқышқа жоллама бериледи.

1,2,3-басқышлар – ҳәр шеректиң үшинши айында (март, июнь, сентябрь) ҳәр бир районда жеңимпаз болған бақсыларға Республикалық басқышқа жоллама бериледи.

4-жуўмақлаўшы басқыш – (декабрь айында) – 1,2,3-басқышлардың жеңимпазлары Республикалық жуўмақлаўшы басқышқа қатнасады.

Таңлаўға 15 жастан – 25 жасқа шекем устаз тәрбиясын алған бақсы ҳаял-қызлар қатансады.
Таңлаўда қатнасыўшылар шәртли түрде Ҳүрлиман бақсы атқарған қосықларының биреўин ҳәм дәстанлардың биринен 12 минутлық үзинди атқарыўы шәрт.
 

Жеңимпазларды сыйлықлаў


Республикалық таңлаў жеңимпазлары Қарақалпақстан Республикасы мәденият ҳәм спорт ислери министрлиги, Халық дөретиўшилиги ҳәм мәдений-ағартыў жумыслары Республикалық илимий-методикалық орайының Диплом ҳәм Ҳүрмет жарлықлары менен сыйлықланады.

Таңлаў шөлкемлестириўшилери Қарақалпақстан Республикасы Мәденият ҳәм спорт ислери министрлиги, Халық дөретиўшилиги ҳәм мәдений-ағартыў жумыслары Республикалық илимий-методикалық орайы, информациялық қәўендер «Нөкис-ФМ» радиосы.

Мағлыўмат ушын телефон: 222-93-21, 591-05-71

Лола Қаллыханова «Нөкис-ФМ» радиосының «Хабар» бөлими редакторы

Дерек: makan.uz

Бөлимлер