Әмет Шамуратовтың 105, Айымхан Шамуратованың 100 жасға толыўы мүнәсибетине арналған коференция болып өтти

Нөкис педагогикалық институтида, «Қарақалпақ әдебияты ҳәм көркем өнериниң қос жулдызы» атамасында Әмет Шамуратовтың туўылғанына 105-жас, Айымхан Шамуратованың туўылғанына 100 жас толыўы мүнәсибетине арналған илимий-әмелий коференция болып өтти.

Конференцияны Қ.Оразымбетов кирис сөз бенен ашып, дәслепки прозаик ҳәм шайыр Әмет Шамуратовтың өткен әсирдиң 30-жылларында баспа сөз бетинде жарық көрген «Ески мектеп» ҳәм «Жолбарыслар арасында» повестлериндеги унамлы ҳәм унамсыз образларды қайта еске түсирип ҳәм оны бүгинги күн ўақыялары менен салыстырып, қысқа гүрриң етти. Әсиресе, Айымхан Шамуратованың, қарақалпақ ҳаял-қызлары арасынан бириншилерден болып, Қарақалпақстан көркем өнери ҳәм мәдениятының раўажланыўына қосқан салмақлы үлесин тилге тийек етип, айрықша атап өтти.

Буннан соң, Филология илимлериниң кандидаты М. Бекбергенова, Музыка тәлими кафедрасының үлкен оқытыўшысы С.Кенжебаева, Қарақалпақ тили ҳәм әдебияты факультетиниң 3-курс студенти А.Жақсылықова ҳәм «Әмет Шамуратов» үй музейиниң баслығы (А.Шамуратовтың қызы) Зүлфия Шамуратовалар шығып сөйлеп, көрнекли шайыр, жазыўшы, драматург ҳәм жәмийетлик искер Әмет Шамуратов ҳәм Өзбекстан ҳәм Қарақалпақстан халық артисти Айымхан Шамуратовалардың дөретиўшилик жолы ҳаққында кең түрде баянатларын оқыды.

 

Конферанцияның екинши бөлиминде шөлкемлестириўшилер (Қарақалпақ әдебияты кафедрасы, Музыка тәлими кафедрасы ҳәм «Зийўар» әдебий дөгереги) тәрепинен, Әмет Шамуратов шаңарағы ағзаларына естелик саўғаларын тапсырды. Сондай-ақ кешениң мазмунлы өтиўи ушын «Айқуллаш» ансамбли атқарыўшылары, Айымхан Шамуратованың айтқан қосықларын шебер атқарыўы конференция қатнасыўшыларына үлкен заўық бағышлады.

 

А.Тәжибаев журналист

Бөлимлер