Төрткүл, Қараөзек ҳәм Елликқала районлары субвенция алыўшылар қатарынан шығарылады

Нөкис­те 2017-жылдың биринши шерегинде социаллық-экономикалық раўажландырыўдың жуўмақлары ҳәм Президентимиз тәрепинен быйылғы жылға белгилеп берилген ең әҳмийетли ўазыйпаларға бағыш­ланған мәжилис болып, оған республика ҳүкиметиниң ҳәм Жоқарғы Кеңес Президиу­мының ағзалары, минис­трликлер менен мәмлекетлик комитетлердиң, ҳуқық қорғаў уйымларының, мәкеме ҳәм кәрханалардың басшылары, район ҳәм қала ҳәкимлери, ғалаба хабар қуралларының ўәкиллери қатнасты.

Мәжилисти Қарақалпақстан Республикасы Министрлер Кеңесиниң Баслығы Қ.Сариев кирис сөз бенен ашты ҳәм алып барды.

Есабат дәўиринде жалпы аймақлық өним 1 триллион 490 миллиард сумды қурап, өсим пәти 107 проценттен асты. Республиканы социаллық-экономикалық раўажландырыў Бағдарламасы тийкарында быйыл 1 триллион 229 миллиард сумлық ҳәм  35 миллион АҚШ долларына тең 2248 жойбарды әмелге асырыў режелестирилген. Соннан, биринши шеректе 41 миллиард сумлық 314 жойбар әмелге асырылып, нәтийжеде 1400 ге шамалас жаңа жумыс орынлары жаратылды. Усы жумысларды даўам еттирип, биринши ярым жылдың жуўмағына шекем 187 миллиард сумлық ҳәм 2 миллион 200 мың АҚШ долларына тең 1025 жойбарды әмелге асырыў және 5 мыңнан аслам жаңа жумыс орнын жаратыў күтилмекте.

Усы жойбарларды әмелге асырыў арқалы жергиликли бюджеттиң дәраматлар базасы кеңейип, быйылғы жылдың өзинде Төрткүл, Қараөзек ҳәм Елликқала районлары субвенция алыўшылар қатарынан шығарылады.

Мәжилисте  ерисилген унамлы нәтийжелер менен бир қатарда айырым ҳәкимликлер, министрликлер менен кәрханалар тәрепинен әмелге асырылып атырған жумыслардың бүгинги күн талабына жуўап бермейтуғыны сынға алынды.

Сондай-ақ, быйылғы жылдың биринши шерегинде республиканы социаллық-экономикалық раўажландырыў ҳаққында Министрлер Кеңеси Баслығының биринши орынбасары М.Содиқов, Аймақларды комплексли раўажландырыў, жол-транспорт ҳәм инженерлик — коммуникация инфраструктура объектлерин қурыў мәселелери бойынша республика ҳүкимети басшысының орынбасары С.Нагметов, Билимлендириў, Денсаўлықты сақлаў системасын раўажландырыў, сондай-ақ, келешек әўладты тәрбиялаў бағдарындағы илажлар ҳаққында Министрлер Кеңеси Баслығының орынбасары М.Жуманов, Ҳаял-қызлар ҳәм жаслар арасында ҳуқықбузарлықтың алдын алыў, аналар ҳәм балалар денсаўлығын сақлаў илажлары ҳаққында Министрлер Кеңеси Баслығының орынбасары, республикалық ҳаял-қызлар комитетиниң баслығы З.Ибрагимова баянатлар жасады.

Бул мәселелер бойынша тийисли тараў басшыларының ҳәм ҳәкимлердиң есаплары тыңланды.

Мәжилисте күн тәртибиндеги мәселелер бойынша ти­йисли шешим қабыл етилди.

Мәжилиске Қарақалпақстан Республикасы Жоқарғы Кеңеси Баслығының орынбасары А.Ҳамраев қатнасты.

Қарақалпақстан хабар агентлиги.

Диққат, диққат!  KRuz.uz сайтини Telegram'даги канал, Instagram'даги саҳифа ва  Facebook'даг гуруҳ орқали кузатиб боринг!

Бөлимлер