#XotiraUz Урыс ҳәм мийнет ветераны Балтабай Ибадуллаев

Урыс ҳәм мийнет ветераны Балтабай Ибадуллаев урысқа кетпестен алдын Төрткүлдеги «Қырыққыз­абад» аймағындағы мектепте хожалық ислери бойынша бөлим баслық болып иследи.

—  Сол пайытлары барлық шаңарақларда  жетиспеўшилик болып, көпшилик балалар мал я қой-қозысын далада бағып жүретуғын, мектепке келмейтуғын еди. Әне, сондай күнлерде жәрдемге «овощ-палыз фонды» дүзилип, мектепке келген оқыўшыларға ҳәр күни азғана бийдай, мәкке дәнин берип жиберетуғын едик. Солай етпесек, мектепке оқыўшыларды қамтып алыў оғада қыйын еди, -деп еслейди Балтабай ата.

Усындай күнлердиң биринде жигитлик ўазыйпасын атқарыў ушын фронтқа жөнеди. Урысқа келген күнлери оны еки айлық парашютистлер таярлайтуғын оқыўға жибереди. Фронтқа дәслепки түскен күнлерде Волга дәрьясының жағысында бирнеше мәрте парашюттен секириўге туўра келди. Фашистлердиң Волга дәрьясынан өтип кетпеўи ушын көпирди жарып жибериўге буйрық алынған еди.

Ата көзлеринен ағып атырған жасларды билдирмей сыпырды.

— l943-жылы Харьковта «Воздух» деген команда болды,-дейди сөзин даўам етип Балтабай ата. — Бул аспаннан киятырған ҳүжим еди. Бизлер окопларда басымызды ийип жатырмыз. Бир пайытта бомба жарылып, ийниме түскен осколка бир ярым жыл денемде жүрди. Мен l946-жылы март айында урыстан қайт­тым. Урыстан қайтқан жылы Нөкис­теги муғаллимлер таярлаў институтының химия-биология факультетине сырттан оқыўға кирдим ҳәм бурын ислеген мектебиме жумысқа орналастым.

1952-жылдан өзим жасаған аймақтағы 8-санлы улыўма билим бериў мектебинде 2000-жылға де­йин иследим. Ҳәзир ғәрезсизлик шарапаты менен бахытлы турмыста жасап, бүгинги тыныш, парахат турмыстың рәҳәтин көрип атырмыз. Жақында ғана район ҳәкими “.Ҳаджиев Президентимиздиң урыс қатнасыўшыларын хошаметлеў ҳаққындағы  Пәрманына муўапық 2 миллион сум пул ҳәм нәўбетсиз автомашина алыў ушын сертификат берип кетти. Еске алыў ҳәм қәдирлеў күни Ташкент қаласына байрамға қатнасыў ушын мирәтнама берди. Бул ушын Президентимизге, республика басшыларына шексиз миннетдармыз. Ташкент қаласына кишкене улым Мамаджан менен бирге барамыз. Буған оғада қуўанышлыман, себеби, бул уллы байрамға жеткен де, жетпеген де бар...

Балтабай ата жети қыз, бес улдың ҳәм еки жүзге жақын ақлық, шаўлық, қуўлықтың атасы. Атамыздағы инсаный пазыйлетлерди бир көргеннен аңлайсыз — туўры сөзли, миймандос, тәлим-тәрбия пидайысы.

Өмир — жасаў ушын гүрес, деп бийкарға айтылмаған. Балтабай ата да урыс жылларында аўыр қыйыншылықларды бастан кеширип, елимиздиң азатлығы ушын қан төкти. Ол тәрбия берген жасларынан бүгинги күнде илим докторлары, шыпакерлер, оқытыўшы ҳәм басқа да тараўлардың жетик қәнигелери турмыстан өз орнын тапты. Оның қәлби ҳәммеге мудамы ашық. Ол жаслар менен ушырасыўларда өз тәжирийбесин, турмыста бастан кеширген  қыйыншылықларын, ақыл-нәсиятларын айтыўдан шаршамайды. Ең баслысы, бүгинги парахат, тыныш, бахытлы заманның қәдирине жетиўге, оқып терең билим алыўға, жәмийеттен өз орнын табыўға шақырады.

Оның шаңарағы мудамы мектеп оқыўшылары, жаслар, шәкиртлери менен толы. Себеби, халқымызда «Қариясы бар үйдиң периштеси бар» деген. Алдымызда усындай аталарымыз аман болсын.

Мунаввара ЮСУПОВА. Төрткүл районы.

Erkinkarakalpak.uz

Диққат, диққат!  KRuz.uz сайтини Telegram'даги канал, Instagram'даги саҳифа ва  Facebook'даг гуруҳ орқали кузатиб боринг!

Бөлимлер