Қарақалпақстанли жүзиўшилер 11 медальды қолға киргизди

Соңғы пайытларда Қарақалпақстан Республикасында тез пәт пенен раўажланып киятырған спорт түрлериниң бири — бул жүзиў болып, оның менен шуғылланатуғын спортшыларымыз ерискен ҳәм ерисип атыр­ған табыслардың салмағы бар­ған сайын артпақта. Әлбетте, бул жетискенликлер усы жолда тасланып атырған қәдемлердиң, жүзиў бойынша қәниге инсанлардың, тренерлердиң машақатлы мийнетлериниң әмелий жемиси болып табылады.

Апрель айының соңғы күнлеринде Үргениш қаласында жүзиў бойынша 1998-жылы туўылған ҳәм оннан үлкен жастағы, 1999-2000 ҳәм 2001-2002-жылларда туўылған жас өспиримлер ҳәм қызлар арасында гезектеги Өзбекистан ашық чемпионаты болып өткен еди. Мәмлекетимиздиң барлық ўәлаятларынан, Қарақалпақстан Республикасынан ҳәм Ташкент қаласынан 350 ден аслам спортшылар қатнасқан бул чемпионатта республикамыз ўәкиллери ҳәр қашанғыдан да табыслы қатнасты.

Атап айтқанда, Нөкис Олимпия резервлери колледжиниң оқыўшылары — Бийбигүл Меңлибаева 50, 100, 200 метр аралыққа брасс усылында ҳәм 100 метрге еркин усылда алтын, 50 метр­ге усы усылда қола медальларын жеңип алған болса, Марджина Уразымбетова 50 метрге баттерфляй усылында өткерилген бәйгиде теңсиз деп табылды. Әдилбек Юсупбаев болса 50, 200 метрге шалқаға жүзиўде финиш сызығын екинши, усы усылда 100 метрге өткерилген жарыста ҳәм 50 метр­ге еркин усылда үшинши болып кесип өтти. Сондай-ақ, 2001-2002-жылларда туўылған спортшылар арасында 4х50 метрге комбинациялы эстафета беллесиўинде Нөкис Олимпия резерви колледжи оқыўшылары Бийбигүл Меңлибаева, Әдилбек Юсупбаев, Арыслан Турымбетов ҳәм Нөкис қалалық 12-санлы мектеп оқыўшысы Гүландам Абдиреймовалар республикамыз сайланды командасының есабына және бир алтын медальды жазып қойды. 1998-жылы туўылған ҳәм оннан үлкен жастағы спортшылар арасында Нөкис Олимпия резервлери колледжи оқыўшылары — Ақжарқын Шәрибаева, Марджина Уразымбетова, НМПИ сту­дент­лери Тимур Сейтов ҳәм Дәўран Сәрсенбаевлар 4х50 метрге комбинациялы эстафета жарысында гүмис медаль менен сыйлықланды. Усылайынша чемпионатта 6 алтын, 2 гүмис ҳәм 3 қола — жәми 11 медальды қолға киргизген қарақалпақстанлы жүзиў шеберлери улыўма командалық есапта да жоқары орынларды ийеледи.

Жас спортшыларымыздың бул табысларында Қарақалпақстан Республикасы сайланды командасының аға тренери Руслан Ильясов ҳәм тренер-оқытыўшылардан Бегзад Турсынов, Нызаматдин Атамуратов ҳәм Асқар Ниязовлардың хызметлери айрықша болды.

С.ЖАНИЕВ.

СҮЎРЕТТЕ: чемпионат жеңимпазлары.

Диққат, диққат!  KRuz.uz сайтини Telegram'даги канал, Instagram'даги саҳифа ва  Facebook'даг гуруҳ орқали кузатиб боринг!

Бөлимлер