2017-2018-жыллардағы гүзги-қысқы мәўсимде халыққа 14022 тонна көмир ҳәм 24000 тонна көмир брикетин жеткерип бериў режелестирилген

Мәмлекетимиз Президенти Ш.Мирзиёев усы жыл 20-21-январь күнлери республикамызға болған сапары даўамында Аралбойы регионында санаат ҳәм өндирис кәрханаларын қурыў және ислеп шығарылған өнимлерди экспорт етиў мәселесине дыққат қаратқан еди.

Елбасшымыздың қарақалпақстанлы белсендилер менен өткерген мәжилисиниң баянламасы ҳәм Министрлер Кабинетиниң 2016-жыл 30-декабрьдеги «Республика халқына ҳәм бюджет мәкемелерине көмир өнимлерин жеткерип бериў механизмин жетилистириўге байланыслы қосымша илажлар ҳаққында»ғы қарары тийкарында республикамыздың Нөкис қаласы, Әмиўдәрья, Елликқала, Төрткүл, Шымбай ҳәм Қоңырат районларында көмир қоймаханалары менен көмир брикетин ислеп шығаратуғын кәрханалардың қурылысы тезлетилген пәт пенен алып барылмақта.

Жумысларды жергиликли ҳәкимият уйымлары тәрепинен белгилеп берилген бас бөлип алып ислеўши кәрханалар- «Бостан абат арнаўлы қурылыс» жеке меншик кәрханасы, «Әмиўдәрья арнаўлы қурылыс», «Бабур Қоңырат қурылыс», «Шымбайлы Мақсет қурылыс» жуўапкершилиги шекленген жәмийетлери әмелге асырмақта.

Хабаршымыз усы кәрханалардағы қурылыс жумысларының барысы, халықты көмир өнимлери менен тәмийинлеўдиң дәрежеси туўралы толығырақ мағлыўмат алыў ушын «Өзбек көмир» Акционерлик жәмийетине қараслы «Қарақалпақкөмир жеткериўши» унитар кәрханасының экономисти Фарид Утемуратовқа мүрәжат етип, сәўбетлести.

Кәрхананың тийкарғы жумысы ҳәм материаллық-техникалық базасына тоқтап өтсеңиз?

- Ҳәзирги ўақытта республикамыздың қала ҳәм районларында қурылысы жуўмақланыў алдында турған кәрханалар жанынан көмирди ҳәм көмир брикетин сақлайтуғын қоймаханалар қурылмақта. Кәрханаларда техникаларды және үскенелерди монтажлаў ҳәм иске қосыў жумыслары да биргеликте әмелге асырылмақта. Елликқала районындағы кәрхананың қуўатлылығы суткасына 150, ал қалған районлардағы кәрханалардың қуўатлылығы 30 тоннаға тең. Кәрханаларға көмир жеткерип бериў ушын автотранспорт ҳәм басқа да зәрүрли техникалар менен механизмлер тоқтаўсыз ислеп тур. Кәрханамыздың балансында «ZL t0 G» маркалы алты автожүклеўши, 20 тонналық «MAN» маркалы бир ҳәм 8 тонналық «ISUZU» маркалы алты автосамосвал бар.

- Кәрханада быйылғы жылдың гүзги-қысқы мәўсиминде халықты ҳәм бюджет мәкемелерин көмир менен тәмийинлеў мақсетинде алып барылып атырған жумыслар қай дәрежеде әмелге асырылмақта.

- «Қарақалпақкөмир жеткериўши» унитар кәрханасы 2021-жылы шөлкемлестирилген. «Өзбеккөмир» акционерлик жәмийети менен шәртнама тийкарында Ангрен көмир кәнинен республикамыз халқына ҳәм бюджет мәкемелерине көмир өнимин жеткерип бермекте. 2017-2018-жыллардағы гүзги-қысқы мәўсимде халыққа 14022 тонна көмир ҳәм 24000 тонна көмир брикетин жеткерип бериў режелестирилген. Ҳәзирги ўақытта қоймаханаларымызда 1043 тонна көмир ҳәм бюджет мекемелерине көмир брикетин ислеп шығарыў ушын 1035 тонна көмир бар. Халыққа жеткерип берилетуғын көмирдиң баҳасы 1 тонна ушын 146400 сум, ал көмир брикети ушын 238000 сум етип белгиленген.   

Нөкис қаласы, Әмиўдәрья районындағы кәрханаларда көмир брикетин ислеп шығарыў үскенелери ҳәм техникалары орнатылып, сынақ тәризинде өним ислеп шығарыў процеси өткерилди. Кәрханаларды зәрүрли үскенелер ҳәм механизмлер менен тәмийинлеў және үскенелеў жумыслары Өзбекистан Республикасы Санаат қурылыс банки тәрепинен ажыратылған 3 миллиард 240 миллион сумлық кредит қаржылары есабынан әмелге асырылмақта.

Улыўма «Қарақалпақ көмир жеткериўши» унитар кәрханасы республика халқының ҳәм бюджет мәкемелериниң сапалы көмир ҳәм көмир брикетине болған талабын анықлаў, сатыў және жеткерип бериў жумысларын талап дәрежесинде алып барып, гүзги-қысқы мәўсимде қатты жанылғыдан машқала болмаўына тийкар жаратпақта.

Н.Рейпназаров,

Қарақалпақстан хабар агентлигиниң хабаршысы

Бөлимлер