Дыққат таңлаў: Қарақалпақстанда өнерментлер арасында пул сыйлығы бар таңлаў өткериледи

Өзбекистан республикасы ғәзерсизлигиниң 26 жыллық байрамы алдынан Қарақалпақстан Республикасы Мәденият министрлиги, Өзбекистан Миллий тикланиш демократиялық партиясы Қарақалпақстан Республикалық Кеңеси, Өзбекистан Көркем-өнер академиясының Қарақалпақстан бөлими, Өзбекистан Саўда-санаат палатасының Қарақалпақстан Республикасы басқармасы ҳәм Қарақалпақстан Республикасы «Өнермент» бирлеспеси менен биргеликте халық қол өнери шеберлери арасында «Қарақалпақ миллий ер ҳәм ҳаял-қызлар кийимлери» республикалық көргизбели таңлаўын өткеретуғынлығын жәриялайды.

Таңлаў төмендеги бағдарлар бойынша өткериледи:

1.Миллий (дәстүрий) ерлер кийими (миллий нағыс түсирилген шапанлар, қундыз териси, қаракөл қамарыдан тигилген бас кийим (бөриклер), жеңсиз, шекпен, тақыя, қалпақ, шөгирме, дегелей, белбеў).

2.Миллий колориттеги заманагөй ерлер кийими (көйлек, костюм, костюм-шалбар).

3.Сахна ушын миллий кийимлер (эстрада қосық атқарыўшылары, сәзенделер, аяқ ойыншылар ҳәм кишкене жастағы балалар ҳәм қызлар кийимлери).

4.Неке кийими (заманагөй үлгидеги келиншек-күйеў кийимлери).

Таңлаўға республикамыздың қала ҳәм районларынан өнерментлер, оқыў орынларындағы өнерге қызығыўшы жаслар менен биргеликте барлық жастағы өнермент тигиўшилер, дизайнер-художниклер ҳәм басқа да ҳәўескерлер қатнасыўына болады.

Таңлаў қатнасыўшылары 2017-жыл 1-августтан 15-августқа шекем Өзбекистан Көркем-өнер Академиясының Қарақалпақстан бөлими Көргизбе сарайында болып өтетуғын көргизбеде өзлериниң дөретиўшилик мийнетлери (тиккен кийимлери) менен қатнасады. Таңлаўға усынылған кийимлер төрешилер тәрепинен баҳаланады.

Жеңимпазларды сыйлықлаў мәресими 15-август күни Бердақ атындағы Қарақалпақ мәмлекетлик академиялық музыкалы театрында болып өтеди.

Жеңимпазлар таңлаў шөлкемлестириўшилери ҳәм қәўендерлер тәрепинен таярланған диплом, баҳалы саўғалар менен, сондай-ақ төмендеги муғдарда ақшалай сыйлықланады:

1-орын 3 000 000 сўм

2-орын 2 000 000 сўм

3-орын 1 000 000 сўм.

Мағлыўмат ушын телефон 222-89-05

Шөлкемлестириў комитети

Дерек: makan.uz

Диққат, диққат!  KRuz.uz сайтини ижтимоий тармоқларда кузатиб боринг

Бөлимлер