Пресс релиз: Қарақалпақстан Республикасы бойынша мәмлекетлик дизимге алынған шет ел инвестициялары қатнасындағы кәрханалардың жумыслары ҳаққында

Республикамызда шет ел инвесторлары ушын кең қолайлықлар жаратылып берилмекте, атап айтқанда Өзбекистан Республикасы Президентиниң 2017 жыл 7 февраль күнги «Өзбекистан Республикасын буннан былай раўажландырыў бойынша ҳәрекетлер стратегиясы ҳаққында»ғы ПП-4947 санлы Пәрманына муўапық инвестицион шәраятты жақсыландырыў тийкарында мәмлекетимиздиң экономика тараўлары ҳәм аймақларына шет ел инвестицияларын белсенде тартыўға айрықша итибар берилмекте.

Сондай-ақ, Өзбекистан Республикасында инвестицион ҳәрекетлерди алып барыў бойынша қабыл етилген 50 ден зыят норматив-ҳуқуқый ҳүжжетлер, атап айтқанда “Шет ел инвестициялары ҳаққында”ғы, “Инвестиция ҳәрекети ҳаққында”ғы, “Шет ел инвесторларының ҳуқықларын қорғаў бойынша кепилликлер ҳәм иләжлар ҳаққында”ғы Нызамларын айтып өтсек болады. 2016 жыл даўамында республика бойынша жәми 10 жаңа шет ел инвестициялары қатнасындағы кәрханалар мәмлекетлик дизимге алынған болса, 2017 жылдың 6 айы ишинде 4 кәрхана дизимге алынды. Нәтийжеде, республиканың Нөкис қаласы ҳәм барлық районларында шет ел инвестициялары қатнасындағы кәрханалар ис жүритпекте. Дизимге алынған шет ел инвестициялар қатнасындағы кәрханалардың тийкарғы үлеси Нөкис қаласы (18), Қоңырат (8) ҳәм Хожели (7) районларына туўры келеди.

Бул кәрханалар ҳәр түрли тараўларда ис жүритпекте, мәселен: фармацевтика, хызмет көрсетиў, жеңил санаат, қурылыс материалларын ислеп шығарыў, қурылыс, азық-аўқат санааты, нефть ҳәм газ санааты ҳәм тағыда басқа тараўларда.

Бул кәрханаларда 3 мыңға жақын адам жумыс пенен бәнт болып, 2016 жылда олар тәрепинен 1 970 млрд. сумнан зыят өнимлер ислеп шығарылып хызметлер көрсетилди. Соннан әмелге асырылған экспорт муғдары 373,7 млн. долларды қурады. Ислеп шығарылған өнимлер қатарында полиэтилен ҳәм полипропилен гранулалар, боян тамыры экстракты, ийирилген жип, натрий сульфаты, артемия цисталары ҳәм автомашиналарға жанылғы газ қуйыў, медицина, мийманхана хызметлери көрсетилгенлигин айтып өтсек болады.

Бул кәрханалар жер жүзиниң 15 тен зыят шет ел мәмлекетлери инвестициялары қатнасында дүзилген болып, Қытай, Россия, Қубла Корея, Уллы Британия, Қазақстан ҳәм басқа мәмлекетлер инвестициялары қатнасында дүзилген. Булардан мысал ретинде жақында Қоңырат районында иске түсирилген полиэтилен ҳәм полипропилен гранулаларын ислеп шығарыў бойынша Өзбекистан ҳәм Қубла Корея инвестициялары қатнасындағы “Uz-Kor Gas Chemical” қоспа кәрханасы, Әмиўдәрья районындағы пахтадан ийрилген жип ислеп шығарыўшы “Amudaryotex” Уллы Британия сырт ел кәрханаларын айтып өтсек болады.

Бүгүнги күнде, шет ел инвестицияларын тартыў барысында Қытай мәмлекетинен инвестициялар муғдары артып бармақта, дизимнен өткен шет ел инвестициялары қатнасындағы кәрханалардың улыўма муғдарынан 26 кәрхана Қытай мәмлекети инвестициялары қатнасындағы кәрханалары есапланбақта.

Мәселен, Қараөзек районындағы қурылыс материалы болған цемент өнимин ислеп шығарыў бойынша “Титан цемент” ЖШЖ ҚК, Шымбай районындағы боян тамыры экстрактын ислеп шығарыў бойынша "Ланэкстракт” ЖШЖ ҚК, Тахтакөпир районындағы “Кегейли экстракт” ЖШЖ ҚК, Қоңырат районындағы “Зеленые растения извлечь” ЖШЖ, артемия цисталарын қайта ислеў бойынша Мойнақ районындағы “Шуан юань” ЖШЖ ҚКлары республикамыз экономикасында әҳмийетли орынларына ийелик етип келмекте. Сондай-ақ, 2017 жыл даўамында боян тамырын қайта ислеў бойынша “Ланко мия” ЖШЖ, “Фубо Нукус” Қытай шет ел кәрханасы, “Кегейли лакрица” ЖШЖ ҳәм т.б. кәраханалар иске түсирилиўи режелестирилмекте.

Сондай-ақ, республикамызға шет ел инвестицияларының муғдарын асырып, шет ел инвестициялары қатнасындағы кәрханаларын қоллап-қуўатлап ҳәм олардың санын көбейтиў бойынша жумыслар даўам етпекте.

Өзбекистан Республикасы Президентиниң 2017 жыл 31 март күнги “Өзбекистан Республикасы Инвестициялар бойынша мәмлекетлик комитетин шөлкемлестириў ҳаққында”ғы ПП-4996 санлы Пәрманына ҳәм 2017 жыл 4 апрель күнги “Өзбекистан Республикасы Инвестициялар бойынша мәмлекетлик комитети ҳәрекетин шөлкемлестириў ис-иләжлары ҳаққында”ғы ПҚ-2868 санлы қарарына муўапық Қарақалпақстан Республикасы инвестициялар бойынша комитети шөлкемлестирилди. Оның тийкарғы ўазыйпалары болып төмендегилер есапланады.

Бирден-бир мәмлекетлик инвестиция сыясатын дүзиў ҳәм жүритиў, соннан экономика тараўларын ҳәм мәмлекет аймақларына инвестицияларды тартыў, республикадағы инвестиция шәраятты жәнеде жақсыландырыў, шет ел капиталы қатнасындағы кәрханалардың раўажланыўын қоллап-қуўатлаў ҳәм шет ел инвестицияларын тартыў;

Өзбекистан Республикасы аймағында инвестиция ҳәрекетлерин кеңейтириў мақсетинде жәнеде қолай шәраятларды жаратыў тараўында норматив-ҳуқуқый базаны жәнеде жақсыландырыў ис-иләжларын ислеп шығыў ҳәм әмелге асырыў тийкарғы ўазыйпаларды атқарады. 

Қарақалпақстан Республикасы Министрлер Кеңеси Мәлимлеме хызмети

Бөлимлер