2018-жыл даўамында Нөкис қаласы ушын тастыйықланған прогноз қанша?

Жақында Нөкис қаласы ҳәкимлигиниң үлкен мәжилислер залында жергиликли бюджетке қосымша дәрамат түсириў дәреклерин анықлаў, оны түсириў ҳәм инфляцияның алдын алыўға, халықты тийкарғы түрдеги тутыныў товарлары менен исенимли тәмийинлеў мәселелерине бағышланған мәжилис болып өтти.

Усы жыл 11-июнь күни Қарақалпақстан Республикасы Жоқарғы Кеңесинде, Жоқарғы Кеңесиниң баслығы М.Ерниязовтың басшылығында Өзбекстан Республикасы Олий Мәжлиси Сенатының ағзалары, Қарақалпақстан Республикасы Жоқарғы Кеңесиниң депутатлары, Өзбекстан Республикасы Есап палатасы баслығының биринши орынбасары, Қарақалпақстан Республикасы Министрлер Кеңеси баслығы ҳәм де тийисли министрликлер менен ведомстволардың, бәрше қала ҳәм район ҳәкимлериниң қатнасында жергиликли бюджетке қосымша дәрамат түсириў дәреклерин анықлаў, оны түсириў ҳәм инфляцияның алдын алыўға бағышланған мәжилис болып өткенлиги, онда белгилеп берилген тапсырмаларды орынлаў ушын Нөкис қаласы жергиликли бюджетине қосымша 407,7 миллиард сўм дарамат табыў дәреклерин анықлаў ҳәм өндириў бойынша тийисли штаб шөлкемлестирилиўи зәрүрлигине айрықша итибар қаратты. Бул штабқа Нөкис қаласы ҳәкиминиң инвестициялар бойынша орынбасары, қалалық қаржы ҳәм Экономика бөлимлери, қалалық мәмлекетлик салық инспекциясы, комерциялық банклер, жер дүзиў ҳәм көшпес мүлк кадастр бөлими, монополия, статистика, прокуратура, прокуратура жанындағы департамент, мәжбүрий орынлаў бюросы, ишки ислер бөлими (ГАИ), Нөкис транспорт басқармасы, электр ҳәм газ тәмийнаты кәрханалары басшылары киритилетуғынлығы атап өтилди.

Және бир әҳмийетли тәрепи 2018-жыл даўамында Нөкис қаласы ушын тастыйықланған прогноз көрсеткиши 847 миллиард сўм етип белгиленген болса, қосымша дәреклер есабынан 1 триллион 294 миллиард сўм түсимди тәмийинлениўи зәрүр.

Штабқа бириктирилген басшылар тәрепинен ҳәр ҳәптеде кеминде еки мәрте аймақларда қосымша дәрамат дәрегин анықлаў ҳәм оны түсириў бойынша әмелге асырылған жумыслар додалап, исленген жумыслар бойынша ҳәр бир басшының есабаты тыңланып барылатуғынлығы белгиленди.

Сондай-ақ, ҳәр бир аймақта қосымша дәрамат дәрегин анықлаў ушын қала ҳәкими ҳәм оның биринши орынбасары, қалалық қаржы бөлими, мәмлекетлик салық инспекциясы басшылары жуўапкер болып есапланатуғынлығы ескертилди.

Соның менен биргеликте мәжилисте быйылғы жыл ушын белгиленген 407,7 миллиард сўм қосымша түсимниң дәреклерин анықлаў бойынша 7 исши топар дүзилетуғынлығы ҳәм олардың күнделикли қатаң ўазыйпалары ҳаққында да кең түрде айтып өтилди.

Мәжилис даўамында бир қатар қәнигелер ҳәм қалалық Кеңес депутатлары тәрепинен де пикир-усыныслар билдирилип, Жергиликли бюджетке қосымша дәрамат дәреклерин анықлаў, оны түсириў ҳәм инфляцияның алдын алыў бойынша әҳмийетли ўазыйпалар беглилеп алынды.

     

Бөлимлер