Депутатлыққа талабан Бийбижан Аралбаева менен сайлаў алды ушырасыў

Күни кеше,  Бозатаў райониндағы «Бозатаў» қала пуқаралар жыйынында 194-санлы «Мәденият» сайлаў округинен Олий Мажлис Нызамшылық палатасы депутатлығына Исбилерменлер ҳәрекети – Өзбекстан Либерал демократиялық партиясынан талабан Бийбижан Аралбаева район халқы менен ушырасты.


Ушырасыўда Б.Аралбаева жыйналған район турғынларына өзиниң сайлаўалды  платформасында белгиленген – халықтың,  әсиресе,  ҳаял-қызлар менен жаслардың интеллектуаллық рейтингин көтериў,  жоқары оқыў орынларына қабыл етиў квоталарының санын арттырыў,  жаңадан жоқары оқыў орынларын шөлкемлестириў,  жаслардың кеминде 50 процентин жоқары мағлыўматлы етиўге имканият жаратыў,  жас шаңарақларды социаллық жақтан қоллап-қуўатлаў,  оларға жеңиллетилген кредитлер ажыратыў бойынша нызамшылықты және де жетилистириў,  сондай-ақ,  Бозатаў,  Мойнақ,  Қанлыкөл,  Қоңырат ҳәм Шоманай районларында туризмниң барлық түрлерин шөлкемлестириў бағдарындағы ўазыйпаларды орынлаў мақсетинде жумыс алып баратуғынлығын атап өтти.


Ушырасыўда талабан тәрепинен усынылған басламалар жыйналғанларда үлкен қызығыўшылық оятты. Талабанның исенимли ўәкиллери де оған исеним билдирип,  сайлаўда оны қоллап-қуўатлаўға шақырды.


 Сондай-ақ, ушырасыў соңында Б.Аралбаева район пуқаралары менен жақыннан жеке сәўбетте болды.

Бөлимлер